VIDEO: रस्त्याखाली काम, रस्त्यावर 'जॅम'! मेट्रो सुरू झाली, पण कार अजूनही ट्रॅफिकमध्येच; वरळी नाक्याजवळची कोंडी कधी फुटणार?

आचार्च अत्रे चौक स्थानकाचं काम मेट्रो सुरू होऊनही पूर्ण झालेलं नाही. या अर्धवट कामाचा फटका रस्ते वाहतुकीला होत आहे.

मुंबई

मुंबईच्या सार्वजनिक वाहतुकीच्या दृष्टीने अतिशय महत्त्वाकांक्षी ठरणाऱ्या भुयारी मेट्रो अर्थात मुंबई मेट्रो-३ चा संपूर्ण टप्पा आता दोन दिवसात सुरू होणार आहे. यात आरे ते कफ परेड असा प्रवास करणं मुंबईकरांना सहजशक्य होणार आहे. पण या मार्गिकेवरील आचार्य अत्रे चौक स्थानकाचं काम मेट्रो सुरू होऊनही पूर्ण झालेलं नाही. या अर्धवट कामाचा फटका रस्ते वाहतुकीला होत आहे. आचार्य अत्रे चौक (वरळी नाका) ते मुंबई महानगरपालिका यानगृह बस स्टॉपपर्यंत सध्या वाहतुकीसाठी एकच लेन सुरू आहे. त्यामुळे मुंबईकरांना वाहतूककोंडीला सामोरं जावं लागत आहे. 

मुंबई मेट्रो-३ चा बीकेसी ते आचार्य अत्रे चौक वरळी नाका हा दुसरा टप्पा ९ मे २०२५ रोजी सुरू झाला. यात आचार्य अत्रे चौक (वरळी नाका) स्थानकाच्या ६ पैकी सध्या दोनच एन्ट्री आणि एग्झिट मार्ग सुरू आहेत. तर उर्वरित चार एन्ट्री आणि एग्झिटचं काम अजूनही पूर्ण झालेलं नाही. या कामामुळे रस्त्याची एक बाजू खोदून ठेवली आहे. तर एका लेनवरुन दुहेरी वाहतूक सुरू आहे. यामुळे रहदारीच्या वेळी याभागात वाहनांच्या लांबच लांब रांगा लागतात. त्यात रस्त्याच्या कामामुळे याठिकाणी सखल भाग झाल्यामुळे पावसाळ्यात पाणीही साचले होते.  वाहनचालकांना साचलेल्या पाण्यातून वाट काढावी लागत असल्याचे व्हिडिओ देखील व्हायरल झाले होते. आता मेट्रोचा दुसरा टप्पा सुरू होऊन जवळपास ५ महिने लोटले आहेत. तरी आचार्य अत्रे चौक स्थानकाचं काम काही पूर्ण होऊ शकलेलं नाही. यावरुन नाराजी व्यक्त केली जात आहे.

कामपूर्ण होण्यासाठी डिसेंबर महिना उजाडणारआचार्य अत्रे चौक मेट्रो स्थानकाच्या कामाची सद्यस्थिती जाणून घेण्याचा प्रयत्न केला असता मुंबई मेट्रो रेल कॉर्पोरेशनने (MMRC) या स्थानकाचे काम डिसेंबर २०२५ पर्यंत पूर्ण होणे अपेक्षित असल्याची माहिती दिली आहे. त्यामुळे वरळी नाका परिसरातील ही वाहतूककोंडी प्रवाशांना आणखी दोन महिने तरी सहन करावी लागणार आहे. अर्धवट कामामुळे मुंबईकरांना कसा त्रास होतोय पाहा व्हिडिओ रिपोर्ट...

संथगतीने काम'एमएमआरसी'च्या दाव्यानुसार आचार्य अत्रे चौक स्थानकाचे स्थापत्य काम पूर्ण झाले आहे. लिफ्ट व एस्कलेटरसारख्या प्रणालींचे काम प्रगतिपथावर आहे. A1 व A2 समोरील रस्त्याचे भराव काम पावसाळ्यामुळे काही काळ बाधित झाले होते. हे काम आता पुन्हा सुरू करण्यात आले असून डिसेंबर २०२५ पर्यंत पूर्ण होऊन नागरिकांच्या वापरासाठी उपलब्ध करुन दिले जाईल. परंतु, याठिकाणी खोदून ठेवलेल्या रस्त्यावर अतिशय संथगतीने काम सुरू असल्याचे निदर्शनास आले आहे. स्थानिकांनीही कामाच्या गतीबाबत साशंकता व्यक्त केली आहे आणि सध्याच्या कामाची गती पाहता डिसेंबरपर्यंत काम पूर्ण होणं अशक्य असल्याचा दावा स्थानिकांनी केला आहे.