ओंकार बिल्डर समूहाचे अध्यक्ष गुप्तासह व्यवस्थापकीय संचालकाला अटक

ईडीची कारवाई : २२ हजार कोटींचा एसआरए घोटाळा

लोकमत न्यूज नेटवर्क

मुंबई : बांधकाम जगतातील अग्रगण्य विकासक समूहापैकी एक असलेल्या ओमकार बिल्डर्स ग्रुपचे अध्यक्ष कमल गुप्ता व व्यवस्थापकीय संचालक बाबूलाल वर्मा यांना सक्तवसुली संचालनालयाने (ईडी) बुधवारी रात्री अटक केली. झोपडपट्टी पुनर्वसन योजनेच्या (एसआरए) २२ हजार कोटींच्या गैरव्यवहार प्रकरणी ही कारवाई करण्यात आल्याचे समजते.

दोघांकडे सुमारे पाच तास कसून चौकशी केल्यानंतर त्यांना अटक करण्यात आली असून गुरुवारी त्यांना न्यायालयात हजर केले जाईल, असे ईडीच्या सूत्रांनी सांगितले.

ओंकार समूहाने झोपडपट्टी पुनर्वसन प्रकल्पासाठी विविध बँकांकडून हजारो कोटी कर्ज घेतले आहे. त्यामध्ये येस बँकेकडून घेतलेल्या ४५० कोटींचा समावेश आहे. ईडीने सोमवारी ओंकार ग्रुपच्या नेपियन्सी रोड येथील मुख्य कार्यालय व निवासस्थानासह विविध १० ठिकाणी छापे टाकले होते. गेले दोन दिवस त्या ठिकाणाहून आर्थिक व्यवहारासंबंधी दस्तावेज व कागदपत्रे जप्त केले होते. बाबूलाल वर्मा आणि कमल गुप्ता यांना २७ जानेवारीला ताब्यात घेऊन चौकशी सुरू केली होती. सुमारे ५ तास कसून चौकशी केल्यानंतर दोघांना अटक करण्यात आली.

...................