मुलींना शाळेतच मार्शल आर्ट्सचे शिक्षण दिले पाहिजे

मुलींना प्रत्येक संकटाशी लढण्याची ताकद शाळेपासूनच दिली पाहिजे. कोणीही छेड काढली तर त्याच्याशी दोन हात करण्यासाठी मार्शल आर्ट्स शाळांमध्ये शिकवले गेले पाहिजे, असे राणी पुढे म्हणाली. आपल्यावर अन्याय झाला, तर त्यासाठी कुणीतरी न्याय मिळवून देण्याची वाट पाहू नका, स्वत:च पुढे होऊन लढा, असा सल्लाही राणीने मुलींना दिला.

‘सपोर्ट माय स्कूल’ या उपक्रमांतर्गत विद्यार्थिनींना ‘शौर्य पदक’ प्रदान करण्यात आले. गरीब परिस्थितीतून आलेल्या या विद्यार्थिनी शालेय अभ्यासक्रमात तसेच विविध खेळ, स्पर्धामध्ये अव्वल क्रमांक मिळवत आहेत. अशा पूजा तोरसकर, नेहा बोके, ऋतुजा हिंदळेकर, मानसी खैरनार आणि कोमल वारखडे या पाच मुलींचा राणीच्या हस्ते सत्कार करण्यात आला. पूजा तोरसकर ही विद्यार्थिनी अपंग असून पाठीच्या मणक्यात सळी घातली असूनही वेदना सहन करत दहावीच्या परीक्षेत तिने 83 टक्के गुण मिळवले आहेत. तिच्या या धाडसाबद्दल तिला शौर्यपदक देण्यात आले आहे. (प्रतिनिधी)