गणेश नाईकांचा धक्कादायक पराभव

naik,loss,,, ठाणे जिल्ह्याचे पालकमंत्री गणेश नाईक यांचा बेलापूर मतदार संघातून धक्कादायक पराभव झाला.

नवी मुंबई : आघाडी सरकारमधील वजनदार मंत्री आणि ठाणे जिल्ह्याचे पालकमंत्री गणेश नाईक यांचा बेलापूर मतदार संघातून धक्कादायक पराभव झाला. भाजपाच्या मंदा म्हात्रे यांनी १४९१ मतांनी निसटता विजय मिळविला असून या ठिकाणी शिवसेनेचेही विजयाचे स्वप्न भंगले.
राज्यामधील प्रमुख लढतींमध्ये नवी मुंबईमधील बेलापूर मतदारसंघावर सर्वांच्या नजरा होत्या. आघाडी सरकारमधील महत्त्वाचे मंत्री व दहा वर्षे ठाणे जिल्ह्याचे पालकमंत्रीपद भूषविलेले गणेश नाईक राष्ट्रवादीकडून निवडणूक रिंगणात होते. त्यांच्या विरोधात राष्ट्रवादीमधून भाजपामध्ये गेलेल्या मंदा म्हात्रे व निवृत्त सनदी अधिकारी विजय नाहटा हे शिवसेनेकडून निवडणूक लढवत होते. या ठिकाणी पहिल्या फेरीपासून चुरस निर्माण झाली. कधी भाजपा, कधी शिवसेना तर कधी राष्ट्रवादी काँगे्रस आघाडीवर होते. प्रत्येक फेरीप्रमाणे निकाल बदलत होता. नक्की कोण जिंकणार याचा अंदाज बांधणे कठीण होत गेले होते. अखेर २६ व शेवटच्या २७ व्या फेरीमध्ये १४९१ मतांनी आघाडी घेत मंदा म्हात्रे विजयी झाल्या.
भाजपाच्या मंदा म्हात्रे यांना ५५३१६ मते पडली . गणेश नाईक यांना ५३८२५ व सेनेच्या विजय नाहटा यांना ५०९८३ मते मिळाली. चौथ्या क्रमांकावर फेकल्या गेलेल्या काँगे्रसला १६६०४ मते पडली आहेत. निवडणुकीपूर्वी राष्ट्रवादी व शिवसेनेमध्ये लढत होईल असे मत व्यक्त केले जात होते. परंतु सर्वांचेच अंदाज फोल ठरवत मंदा म्हात्रे यांनी नाईक यांचा त्यांच्या बालेकिल्ल्यात पराभव केला . (प्रतिनिधी)