परिवहनच्या कर्मचाऱ्यांची थकबाकी ८० कोटी

वैद्यकीय भत्ता आणि सेवानिवृत्त कर्मचाऱ्यांच्या थकबाकीपोटी परिवहनला आजही ७९ कोटी ६९ लाख ५० हजारांचे देणे आहे. जुलै २००७ पासूनची ही थकबाकीे आहे.

ठाणे : ठाणे परिवहन सेवेचे अंदाजपत्रक शुक्रवारी सादर झाले असून यामध्ये कामगारांचा महागाईभत्ता, सार्वजनिक सुट्या, वैद्यकीय भत्ता आणि सेवानिवृत्त कर्मचाऱ्यांच्या थकबाकीपोटी परिवहनला आजही ७९ कोटी ६९ लाख ५० हजारांचे देणे आहे. जुलै २००७ पासूनची ही थकबाकीे आहे.
परिवहनच्या ताफ्यात आजघडीला ३१३ बस असल्या तरी प्रत्यक्षात रस्त्यावर १८० च्या आसपास धावत आहेत. प्रवासी एक लाखांनी कमी झाले असून रोज परिवहनमधून सुमारे अडीच लाख प्रवासी प्रवास करीत आहेत. रोजचे उत्पन्न १८ ते २० लाखांच्या घरात आहे. परंतु, उत्पन्नापेक्षा खर्च हा अधिक असल्याने परिवहनपुढे थकबाकीचा डोंगर उभा राहिला आहे. यातीलच एक महत्त्वाची बाब म्हणजे आजही कर्मचाऱ्यांना पाचव्या आणि सहाव्या वेतन आयोगातील फरकाची रक्कम मिळालेली नाही.
या फरकाच्या महागाईभत्त्याचे १२ कोटी २० लाख २५ हजार ६५० रुपये अद्यापही शिल्लक आहेत. तसेच सार्वजनिक सुट्यांपोटी यामध्ये भाऊबीज, पाडवा, रक्षाबंधन, १ मे, गणपती आदींसह इतर सुट्यांचे २ कोटी ६६ लाख ११ हजार, वैद्यकीय भत्त्यापोटी ४ कोटी २३ लाख २० हजार, रजा प्रवासभत्ता ३ कोटी, ७१ लाख ४ हजार ३५०, पेन्शनधारक ५८ लाख ८० हजार, शैक्षणिक भत्ता २३ लाख ६८ हजार, पूरक प्रोत्साहनभत्ता ८६ लाख ८९ हजार, असे एकूण २४ कोटी ६९ लाख ५० हजार आणि सहाव्या वेतन आयोगाची थकीत रक्कम ५५ कोटी अशी एकूण ७९ कोटी ६९ लाख ५० हजारांची थकबाकी आहे. तसेच सेवानिवृत्त कर्मचाऱ्यांचीही ५.८४ कोटींची थकबाकी असून यामध्ये पाचव्या, सहाव्या वेतन आयोगापोटी महागाईभत्त्याची थकबाकी, रजा प्रवासभत्ता, वैद्यकीय, शैक्षणिक, सार्वजनिक सुटी, सेवानिवृत्त कर्मचाऱ्यांचे अर्जित रजा वेतन आदींचा यात समावेश आहे.
याशिवाय, सीएनजीपोटी १३.९० कोटींची थकबाकी असल्याचेही स्पष्ट झाले आहे. त्यानुसार, या अंदाजपत्रकात ८ कोटी १० लाख इतक्या रकमेतून कर्मचाऱ्यांची ७ कोटी व सेवानिवृत्त कर्मचाऱ्यांची १ कोटी १० लाख इतक्या रकमेची तरतूद केली आहे. प्रत्यक्षात ती हाती मिळते कधी आणि दिली जाते कधी हा प्रश्न कायमच राहणार आहे.
(प्रतिनिधी)