आधी पिक्चर बघा मगच प्रतिक्रिया द्या
या न्यूड एमएमएसमुळं नेहा सध्या खूप चर्चेत आली असून हा तिचा पब्लिसिटी स्टंट आहे, अशी चर्चाही सुरू झाली. नेहाने मात्र हा एमएमएस म्हणजे पैशांसाठी किंवा पब्लिसिटी केलेला स्टंट नसून एका सिनेमातला सीन असल्याचा खुलासा केला आहे. ‘पेटेंड हाऊस’ नावाच्या मल्याळी सिनेमातील हा सीन असून भूमिकेची गरज म्हणून हा सीन केल्याचा दावा नेहाने केला. 'एक वृद्धत्वाकडे झुकलेला लेखक हे या सिनेमातलं प्रमुख पात्र. या लेखकाला मृत्यू खुणावतोय आणि त्याचा परिणाम म्हणून स्वतःच्या गत आयुष्याकडे पाहाताना तो त्याच्यातल्या स्त्री आणि पुरुष या प्रवृत्ती त्याला दिसतात. या स्त्री प्रवृत्तीची एक प्रतिमा म्हणजे माझं पात्र आहे. ही अतिशय आव्हानात्मक भूमिका असून त्यात काही प्रमाणात नग्नता असली तरी त्यात बीभत्सतेचा लवलेशही नाही, याची खात्री पटल्यानंतरच भूमिका स्वीकारली, असं नेहाने सांगितलं.
ही भूमिका साकारणं म्हणजे वैचारिक प्रगल्भतेतून घेतलेला निर्णय होता. सिनेमा पूर्ण संदर्भासहित पाहिला तर या न्यूड दृष्यांविषयीचा दृष्टीकोन बदलेल याची खात्री आहे असंही नेहानं नमूद केले. कलाकार म्हणून कथा आवडली आणि जे काही आव्हानात्मक असेल ते ते करायला आवडतं आणि तेच मी करते. कलेसाठी कोणत्याच गोष्टीचे नियम आणि बंधनं नाहीत. परदेशात या गोष्टी चालतात आणि आपल्याकडे नाही असं एक कलाकार म्हणून मला वाटत नाही, असंही नेहा म्हणाली. आपल्या अभिनयातून योग्य तो संदेश पोहचणं मला महत्त्वाचं वाटतं. या भूमिकेविषयी आणि न्यूड सीनबद्दल मी माझ्या पालकांनाही पूर्ण कल्पना दिल्याचं नेहानं सांगितलं. 'माझ्या आई वडिलांना या सिनेमातल्या भूमिकेचं गांभीर्य समजलं आणि त्यांनीही या सीन्ससाठी पूर्णपणे पाठिंबा दिला.' इतकंच नाहीतर माझा मित्र आणि प्रसिद्ध दिग्दर्शक महेश मांजरेकर यांनीही आपल्या भूमिकेचं कौतुक केलं, असं नेहानं सांगितलं. या न्यूड सीन्समध्ये, मल्याळी सिनेमातील भूमिकेत कोणताही आंबट शौकिनपणा नसल्याचा दावा नेहानं केला असून माझ्यावर विश्वास ठेवा असं आवाहन तिने चाहत्यांना व रसिकांना केलं आहे. जसा हा मल्याळी सिनेमा व भूमिका माझ्या विचारांना पटली, तसा तो तुम्हालाही पटेल, आधी सिनेमा बघा आणि मगच त्यावर प्रतिक्रिया द्या, थेट प्रतिक्रिया आणि टीका करणं चुकीचं असल्याचं नेहाने म्हटलं.