ऑनलाइन टीम
मुंबई, दि. १ - 'पीके' चित्रपटाचे आमिर खानचे निर्वस्त्र अवस्थेतील पोस्टर सध्या चांगलेच चर्चेत असून यामुळे नवीन वादाला तोंड फुटण्याची शक्यता आहे. आमिरच्या या फोटोवर त्याच्या चाहत्यांनी विविध प्रतिक्रिया दिल्या असून अनेकांसाठी त्याचा हा लूक अतिशय धक्कादायक असल्याचे व त्याच्याकडून अशा फोटोची अपेक्ष नसल्याचेही मत व्यक्त केले आहे. मात्र चित्रपटात अशी निर्वस्त्र (न्यूड) पोझ देणारा आमिर हा काही पहिलाच अभिनेता नाहीये. याआधीही अनेक अभिनेत्यांनी मोठ्या पडद्यावर आपले कपडे उतरवले आहेत. त्यात रणबीर कपूर, राजकुमार यादव, जॉन अब्राहम, नील नितीन मुकेश, यांचा समावेश आहे.
शाहरुख खान
चित्रपट : माया मेमसाब
केतन मेहताच्या या चित्रपटात शाहरुख खानही निर्वस्त्र दिसला होता. या चित्रपटातील दृश्यांमुळे त्याकाळी मोठा वाद निर्माण झाला होता.
जॉन अब्राहम
चित्रपट : न्यूयॉर्क
कबीर खान दिग्दर्शित या चित्रपटात जॉनला एक संशयित दहशतवादी दाखवण्यात आला असून तुरुंगातील चौकशीदरम्यान पोलिस त्याला अमानुषपणे मारहाण करतात. त्यात एका सीनमध्ये त्याला निर्वस्त्र अवस्थेत दाखवण्यात आले आहे. तर 'दोस्ताना' या चित्रपटातील जॉनने असे दृश्य दिले आहे.
रणबीर कपूर
चित्रपट : सावरिया
संजय लीला भन्साळीच्या या चित्रपटातून रणबीरने सिनेसृष्टीत पदार्पण केले. प्रेमात पडलेल्या रणबीरचा गाण्यादरम्यान टॉवेल सटकतो आणि तो निर्वस्त्र दिसतो, असे दृष्य या चित्रपटात दाखवण्यात आले आहे.
नील नितीन मुकेश
चित्रपट : जेल
मधुर भांडाकरच्या या चित्रपटातील जेलमधील दृश्यात नील नितीन मुकेशला पोलिस निर्वस्त्र होण्यास भाग पाडतात.
कुणाल कपूर
चित्रपट : रंग दे बसंती
राकेश ओम प्रकाश मेहरा यांनी दिग्दर्शित केलेल्या चित्रपटात कुणाल कपूरने स्वातंत्र्यसैनिकाची भूमिका केली असून ब्रिटीशांच्या राजवटीत त्याला अटक केली जाते. तुरुंगात त्याला निर्वस्त्र करण्यात येते, असे एका दृश्यात दाखवण्यात आले आहे.
राज कुमार
चित्रपट : शाहिद
हंसल मेहताचे दिग्दर्शन असलेल्या या चित्रपटात 'काय पो छे' चित्रपट फेम अभिनेता राज कुमारने वकिलाची भूमिका केली आहे. खोट्या आरोपाखांली त्याला अटक करण्यात येते आणि तुरूंगात त्याचा छळ होतो. त्या दृश्यात तो निर्वस्त्र दाखवण्यात आला.
याशिवाय हॉलिवूडच्या अनेक चित्रपटातही तेथील अभिनेत्यांनी निर्वस्त्र दृश्ये दिली आहेत. 'फाईट क्लब' चित्रपटात ब्रॅड पिटने, 'दि एव्हिएटर'मध्ये लिओनार्डो दि कॅप्रिओने, अशी दृश्ये दिली होती.