अमेरिकेचा चीनला मोठा झटका! आणखी एका कंपनीने कामकाज केलं बंद; ४०० कर्मचाऱ्यांची नोकरी गेली

Trade War Impact : अमेरिका-चीनमध्ये सुरू असलेल्या व्यापार युद्धाचा परिणाम आता तंत्रज्ञान क्षेत्रावर होत आहे. याचा थेट फटका आता चीन कामगारांना बसला आहे.

SAS Institute China Exit : अमेरिका आणि चीन यांच्यातील वाढत्या ट्रेड वॉरचा परिणाम आता थेट टेक इंडस्ट्रीत दिसून येत आहे. अमेरिकेतील सॉफ्टवेअर क्षेत्रातील दिग्गज कंपनी SAS इन्स्टिट्यूटने २५ वर्षांनंतर चीनमधून आपला व्यवसाय बंद करण्याचा मोठा निर्णय घेतला आहे. कंपनीच्या या अचानक घेतलेल्या कारवाईत, ४०० कर्मचाऱ्यांना केवळ एका व्हिडीओ कॉलवर नोकरीवरून काढण्यात आले आहे. खासगी कारणे असोत वा राजकीय तणाव, अमेरिकेच्या या निर्णयामुळे चीनसाठी नवीन चिंता निर्माण झाली आहे.

SAS ने चीनमधील ऑपरेशन केले बंदसाउथ चायना मॉर्निंग पोस्टच्या अहवालानुसार, ॲनालिटिक्समध्ये विशेष ज्ञान असलेल्या या कंपनीने चीनमधील सुमारे ४०० नोकऱ्या एका फटक्यात संपुष्टात आणल्या आहेत. कंपनीच्या या निर्णयामुळे प्रभावित झालेल्या कर्मचाऱ्यांनी सांगितले की, कंपनीने ईमेल आणि व्हिडीओ कॉलद्वारे कपातीची घोषणा केली. यावेळी कंपनीच्या अधिकाऱ्यांनी याचे कारण 'संघटनात्मक अनुकूलन' असल्याचे सांगितले. प्रभावित कर्मचाऱ्यांना १४ नोव्हेंबरपर्यंत 'सेपरेशन ॲग्रीमेंट'वर सही करण्यास सांगण्यात आले आहे. त्यांना देण्यात आलेल्या भरपाई पॅकेजमध्ये एका महिन्याचा पगार, दोन महिन्यांचा ॲडव्हान्स पगार, बोनस आणि या वर्षाच्या अखेरपर्यंतचा पगार समाविष्ट आहे.

कंपनीचा अधिकृत खुलासाSCMP ला दिलेल्या निवेदनात SAS च्या प्रवक्त्यांनी सांगितले की, SAS चीनमधील आपला व्यवसाय बंद करत आहे. हा निर्णय आमच्या जागतिक स्तरावर काम करण्याच्या पद्धतीत बदलाचा भाग आहे. यामुळे आम्ही आमचे नियोजन मजबूत करत असून दीर्घकाळ स्थिरता आणण्यासाठी हा निर्णय घेतला आहे." तरीही, कंपनी तिसऱ्या-पक्षीय भागीदारांमार्फत देशात आपली उपस्थिती कायम ठेवेल, असे प्रवक्त्यांनी स्पष्ट केले.

२५ वर्षांचा प्रवास संपुष्टातउत्तरी कॅरोलिनास्थित SAS ने १९९९ मध्ये चीनमध्ये प्रवेश केला होता. २००५ मध्ये बीजिंगमध्ये एक संशोधन आणि विकास केंद्र आणि वापरकर्ता मदत सेवा सुरू केली होती. विशेष म्हणजे, या कंपनीला सलग १७ वर्षे 'टॉप एम्प्लॉयर चायना' हा किताब मिळाला होता. अहवालानुसार, शांघायमधील ऑफिस आता जवळजवळ खाली आहे, तर ग्वांगझूमधील दोन शाखा बंद झाल्या आहेत.

वाचा - बँक ऑफ बडोदा FD वर देत आहे जबरदस्त व्याज! ₹२ लाखांवर मिळवा ₹८४,३४९ पर्यंत 'गॅरंटीड' रिटर्न

आणखी कंपन्या चीनला सोडताहेतSAS ही एकमेव अमेरिकन कंपनी नाही, जिने जगातील दुसऱ्या सर्वात मोठ्या अर्थव्यवस्थेतून आपले बस्तान हलवले आहे. सप्टेंबरमध्ये शांघाय आणि झियामेन येथील डेल टेक्नॉलॉजीजने आपल्या युनिट्समध्ये कर्मचाऱ्यांची कपात केली होती. तर मायक्रोन टेक्नॉलॉजीने कमजोर मागणीमुळे कपातीची घोषणा केली होती. या वर्षाच्या सुरुवातीला ३२ वर्षांचे ऑपरेशन असलेली आयबीएम (चायना) इन्व्हेस्टमेंट कंपनी बंद केली होती. या वाढत्या बहिष्कारांमुळे चीनच्या टेक आणि रोजगार क्षेत्रासाठी नवीन समस्या उभी राहिली आहे.