नवी दिल्लीः देशभरात कोरोनानं धुडगूस घातल्यानंतर केंद्र सरकारनंही सतर्कतेची पावलं उचलण्यास सुरुवात केली आहे. कोरोनाग्रस्तांसाठी रुग्णालयाच्या वेगळ्या कक्षाची निर्मिती केल्यानंतर रिलायन्सनं आता 30,000 पेक्षा कमी वेतन असणाऱ्यांसाठी महत्त्वाचा निर्णय घेतला आहे. ज्यांना दरमहा 30,000 पेक्षा कमी वेतन आहे, त्यांना महिन्यातून दोनदा पगार मिळणार आहे. म्हणजे 30 हजारपेक्षा कमी पगार असलेल्या व्यक्तींनी निम्मा पगार 15 तारखेला आणि निम्मा पगार महिन्याच्या शेवटी मिळेल. कमी पगारदारांना सध्याच्या दिवसांत आर्थिक मदत करण्यासाठी रिलायन्सनं हा निर्णय घेतला आहे. लाइव्ह मिंटनं अशा आशयाचं वृत्त दिलं आहे. चीनच्या वुहान शहरात जन्मलेल्या या प्राणघातक विषाणूने जगभरात 10000हून अधिक लोकांचा बळी घेतला आहे. भारतात आतापर्यंत जवळपास 500हून कोरोना व्हायरस पॉझिटिव्ह रुग्ण आढळले आहेत.कंपनीनं रिलायन्स फाउंडेशन, रिलायन्स रिटेल, जिओ, रिलायन्स लाइफ सायन्सेस, रिलायन्स इंडस्ट्रीज आणि रिलायन्स फॅमिलीच्या 6,00,000 कर्मचाऱ्यांना कोरोनाविरोधात लढण्याच्या योजनेवर काम करण्यासाठी तैनात केले आहे. कर्मचारी घरी बसले असले तरी कंपनी कंत्राटी आणि कायमस्वरूपी असलेल्या कामगारांना पगार देणार आहे. रिलायन्स इंडस्ट्रीजने रिलायन्स जिओ नेटवर्कसाठी काम करणाऱ्या कर्मचाऱ्यांना वगळता इतरांना वर्क फ्रॉम होम करण्याचाही सूचना केल्या आहेत.
Coronavirus: मुकेश अंबानी मदतीला धावले; अवघ्या दोन आठवड्यांत कोरोनाबाधितांसाठी रुग्णालय उभारले
रिलायन्स कंपनीनं मुंबई महापालिकेच्या मदतीनं कोरोनाग्रस्त रुग्णांसाठी सेव्हन हिलमध्ये 100 बेड्सचं विलगीकरण कक्ष तयार केलं असून, मुंबईत कोरोना बाधित रुग्णांची संख्या वाढल्यास त्यांना या रुग्णालयात दाखल करण्यात येणार आहे. कोरोनाच्या विरुद्धच्या सामूहिक लढाईत आरआयएलने आपल्या कर्तव्याचे पालन करत 24x7 देशाच्या सेवेसाठी तत्पर असल्याचे सिद्ध केले आहे.