दरवाढीनंतर आज किती रुपयांना मिळतंय पेट्रोल-डिझेल? जाणून घ्या तुमच्या शहरातील ताजे दर...

Petrol-Diesel Price: केंद्र सरकारने गेल्या शुक्रवारी देशभरात पेट्रोल आणि डिझेलच्या दरात प्रति लीटर ३ रुपयांची वाढ केली.

Petrol-Diesel Price on May 18: इराण आणि अमेरिकेमधील वाढत्या तणावाच्या पार्श्वभूमीवर भारतात अनेक महिन्यांपासून स्थिर असलेले इंधनाचे दर वाढणार असल्याची शक्यता वर्तवली जात होती. अखेर केंद्र सरकारने गेल्या आठवड्यात शुक्रवारी (१५ मे) देशभरात पेट्रोल आणि डिझेलच्या दरात प्रति लीटर ३ रुपयांची वाढ केली. 

विशेष म्हणजे, किरकोळ ग्राहकांसाठी गेल्या जवळपास चार वर्षांत करण्यात आलेली ही पहिलीच दरवाढ आहे. दरम्यान, आज म्हणजेच १८ मे रोजी देशभरात इंधनाचे दर स्थिर असून कालच्या तुलनेत यात कोणताही बदल झालेला नाही. 

आजचे देशभरातील प्रमुख शहरांमधील इंधनाचे दर:

शहर	पेट्रोलची किंमत प्रति लिटर	डिझेलची किंमत प्रति लिटर
दिल्ली	९७.७७ रुपये	९०.६७ रुपये
मुंबई	१०६.६८ रुपये	९३.१४ रुपये
कोलकाता	१०८.७० रुपये	९५.१३ रुपये
बंगळुरू	१०६.२१ रुपये	९४.१० रुपये
चेन्नई	१०३.६७ रुपये	९५.२५ रुपये
लखनऊ	९७.५५ रुपये	९०.८२ रुपये
पटना	१०८.५५ रुपये	९४.६३ रुपये
रायपूर	१०३.५६ रुपये	९६.५५ रुपये
रांची	१००.८४ रुपये	९५.७६ रुपये

सर्वसामान्यांच्या खिशाला कात्री

बाजार तज्ज्ञांच्या मते, पेट्रोल आणि डिझेलच्या किमतीत झालेल्या या वाढीचा थेट फटका सर्वसामान्यांच्या घरगुती बजेटला बसणार आहे. किराणा मालाचे बिल आणि दैनंदिन सेवा महागण्याची दाट शक्यता आहे. बिस्किट्स, स्नॅक्स, इन्स्टंट नूडल्स, खाद्यतेल आणि पॅकेज्ड फूड यांसारख्या रोजच्या वापरातील वस्तू महाग होऊ शकतात. या कंपन्यांचे संपूर्ण जाळे वाहतूक व्यवस्थेवर अवलंबून असते. डिझेल महागल्यामुळे कंपन्यांचा लॉजिस्टिक्स आणि वितरणाचा खर्च वाढणार आहे, परिणामी उत्पादनांच्या किमती वाढू शकतात.

शेतातून बाजारपेठेत (मंडई) आणि तिथून ग्राहकांपर्यंत माल पोहोचवण्याचा वाहतूक खर्च वाढल्याने फळे आणि भाज्यांचे दरही कडाडण्याची शक्यता आहे. वाहतूक आणि इतर परिचालन खर्च वाढल्याचे कारण देत 'अमुल' आणि 'मदर डेअरी'ने नुकतीच दुधाच्या दरात प्रति लीटर २ रुपयांची वाढ केली आहे. आता इंधन दरवाढीमुळे इतर डेअरी उत्पादनांवरही याचा परिणाम दिसू शकतो.