New GST Rates List : केंद्र सरकारने सामान्य नागरिक आणि छोट्या व्यावसायिकांना दिलासा देण्यासाठी जीएसटी दरांमध्ये मोठी कपात केली आहे. या निर्णयानुसार, आता साबण, लहान गाड्या, मोटरसायकल, विमा आणि औषधे यांसारख्या रोजच्या वापरातील वस्तूंवर कमी कर लागेल. जीएसटीमध्ये आधी चार प्रकारचे टॅक्स स्लॅब होते, पण आता फक्त ५% आणि १८% असे दोनच दर असतील. मात्र, तंबाखू आणि आलिशान गाड्यांसारख्या काही महागड्या वस्तूंवर ४०% कर लागू होईल.
कधीपासून लागू होतील नवे दर?पंतप्रधान नरेंद्र मोदी यांनी १५ ऑगस्ट रोजी लाल किल्ल्यावरून केलेल्या भाषणातच दिवाळीपूर्वी जीएसटीमध्ये दिलासा मिळेल, असे संकेत दिले होते. त्यानंतर बुधवारी रात्री झालेल्या जीएसटी परिषदेच्या बैठकीत टॅक्स स्लॅब चार वरून दोनवर आणण्याचा निर्णय घेण्यात आला. सरकारने जाहीर केल्यानुसार, हे बदल येत्या २२ सप्टेंबर म्हणजेच नवरात्रीच्या पहिल्या दिवसापासून लागू होतील.
नव्या जीएसटी दरांचा नेमका परिणाम काय?सरकारच्या या निर्णयामुळे अनेक क्षेत्रांवर थेट परिणाम होणार आहे. कोणत्या वस्तूंवर किती जीएसटी लागेल, ते सविस्तर पाहूया.१. रोजच्या वापरातील वस्तू (५% जीएसटी)हेअर ऑइल, साबण, शॅम्पू, टूथब्रश, टूथपेस्ट, सायकल, किचनमधील भांडी, पॅकेज्ड नमकीन, भुजिया, सॉस, पास्ता, इन्स्टंट नूडल्स, चॉकलेट, कॉफी, लोणी (बटर), तूप आणि इतर सर्व पॅकेज्ड खाद्यपदार्थांवरील जीएसटी आता कमी करून ५% करण्यात आला आहे. यामुळे सामान्य नागरिकांना मोठा दिलासा मिळणार आहे.
२. गाड्या आणि बांधकाम साहित्य (१८% जीएसटी)४ मीटरपेक्षा कमी लांबीच्या आणि १२०० सीसी क्षमतेच्या पेट्रोल कार तसेच १५०० सीसी क्षमतेच्या डिझेल कारवर जीएसटी २८% वरून १८% करण्यात आला आहे. यामुळे ऑटो क्षेत्राला चालना मिळेल. तसेच, ३५० सीसी पर्यंतच्या मोटरसायकलवरही १८% जीएसटी लागेल. सिमेंट आणि बांधकाम साहित्यावरील कर १८% झाल्यामुळे रिअल इस्टेट क्षेत्राला आणि परवडणाऱ्या घरांच्या बांधकामाला फायदा होईल.
३. आरोग्य आणि विमा सेवा (०% जीएसटी)वैयक्तिक जीवन विमा, आरोग्य विमा आणि कुटुंबातील सदस्यांसाठीच्या 'फॅमिली फ्लोटर' पॉलिसी तसेच ज्येष्ठ नागरिकांच्या पॉलिसी आता पूर्णपणे करमुक्त (०%) असतील. यासोबतच, जीवनावश्यक औषधे, कर्करोग आणि दुर्मिळ आजारांवरील औषधांवरही कोणताही कर लागणार नाही, हा एक मोठा दिलासा आहे.
४. लक्झरी वस्तूंवर ४०% जीएसटीमोठ्या गाड्या, ३५० सीसीपेक्षा जास्त क्षमतेच्या मोटरसायकल, तंबाखू उत्पादने, पान मसाला, सिगारेट, कोल्ड्रिंक्स आणि कॅफीनयुक्त पेये यांसारख्या 'पाप वस्तू' आणि आलिशान वस्तूंवर आता ४०% जीएसटी लागेल. मात्र, हे दर तंबाखू उत्पादनांवर लगेच लागू होणार नाहीत.
वाचा - GSTबाबत सरकारकडून भेट, दैनंदिन वापरातील वस्तू कुठल्या स्लॅबमध्ये आल्या? पाहा संपूर्ण यादी
सरकारच्या या निर्णयामुळे ग्राहकांना रोजच्या वापरातील वस्तू स्वस्त मिळतील, तर ऑटो आणि रिअल इस्टेटसारख्या उद्योगांनाही चालना मिळेल अशी अपेक्षा आहे.