म्युच्युअल फंडाचा ‘धमाका’; इक्विटी गुंतवणुकीत ५६ टक्क्यांची मोठी वाढ!

‘एसआयपी’नेही ओलांडला ३२ हजार कोटींचा टप्पा

लोकमत न्यूज नेटवर्क, नवी दिल्ली: शेअर बाजारातील अस्थिरता आणि जागतिक पातळीवरील अनिश्चितता असूनही भारतीय गुंतवणूकदारांनी म्युच्युअल फंडावर आपला विश्वास कायम ठेवला आहे. मार्च महिन्यात इक्विटी (शेअर आधारित) म्युच्युअल फंड योजनांमधील निव्वळ गुंतवणूक ५६ टक्क्यांनी वाढून ४०,४५० कोटी रुपयांवर पोहोचली आहे. जुलै २०२५ नंतरचा हा एका महिन्यातील सर्वांत मोठा गुंतवणुकीचा आकडा ठरला आहे.

एसआयापीचा नवा उच्चांक

शिस्तबद्ध गुंतवणुकीचा मार्ग असलेल्या ‘एसआयपी’ द्वारे होणाऱ्या गुंतवणुकीतही मोठी वाढ झाली. फेब्रुवारीत २९,८४५ कोटी रुपये असलेली एसआयपी गुंतवणूक मार्चमध्ये ३२,०८७ कोटींवर गेली आहे. मार्चमध्ये गोल्ड ईटीएफ गुंतवणूक कमी झाली आहे.

फ्लेक्सी, मिड कॅपला पसंती

• गुंतवणूकदारांनी प्रामुख्याने फ्लेक्सी कॅप, मिड कॅप आणि स्मॉल कॅप फंडांमध्ये सर्वाधिक रस दाखवला आहे. 
• ‘ॲम्फी’ने जाहीर केलेल्या ताज्या आकडेवारीनुसार, एकट्या फ्लेक्सी कॅप फंडात १०,००० कोटी रुपयांहून अधिक गुंतवणूक झाली आहे. 
• दुसरीकडे, करबचतीसाठी असलेल्या ‘ईएलएसएस’ योजनांमधून मात्र गुंतवणूकदारांनी काही प्रमाणात पैसे काढल्याचे दिसून आले.