पिनची गरज नाही; फिंगरप्रिंट किंवा फेस ID ने करा UPI पेमेंट, 'या' बँकेने सुरू केली खास सुविधा

बँकेने UPI व्यवहारांसाठी बायोमेट्रिक ऑथेंटिकेशन फीचर सुरू केले आहे.

ICICI UPI Payment: डिजिटल पेमेंट अधिक जलद आणि सुरक्षित करण्याच्या दिशेने ICICI Bankने महत्त्वाचे पाऊल उचलले आहे. बँकेने आपल्या iMobile Pay अॅपमध्ये UPI व्यवहारांसाठी बायोमेट्रिक ऑथेंटिकेशन फीचर सुरू केले आहे. या सुविधेमुळे ग्राहकांना आता ₹५,००० पर्यंतचे व्यवहार फिंगरप्रिंट किंवा फेस आयडीच्या मदतीने, UPI PIN न टाकता करता येणार आहेत.

भारतामध्ये डिजिटल पेमेंटचा वापर झपाट्याने वाढत असताना, ही सुविधा व्यवहार अधिक सुलभ करण्यासोबतच सुरक्षितताही वाढवणार आहे. या नव्या फीचरअंतर्गत ₹५,००० पर्यंतच्या UPI व्यवहारांसाठी PIN टाकण्याची गरज भासणार नाही, मात्र त्यापेक्षा जास्त रकमेच्या व्यवहारांसाठी पूर्वीप्रमाणे UPI PIN आवश्यक राहील.

या सुविधेचा उद्देश केवळ वेग वाढवणे नसून सुरक्षा अधिक मजबूत करणे हा देखील आहे. अनेकदा गर्दीच्या ठिकाणी PIN टाकताना ‘शोल्डर सर्फिंग’चा धोका असतो, म्हणजेच इतर व्यक्ती PIN पाहू शकते. बायोमेट्रिक ऑथेंटिकेशनमुळे हा धोका मोठ्या प्रमाणात कमी होतो. आता ग्राहक फक्त एक टच किंवा फेस स्कॅन करून सहज आणि सुरक्षितपणे पेमेंट करू शकतील.

ही सुविधा विविध प्रकारच्या UPI व्यवहारांसाठी लागू असेल. पैसे पाठवणे, दुकानात QR कोड स्कॅन करून पेमेंट करणे, ऑनलाइन खरेदी किंवा व्यापाऱ्यांना देय देणे अशा सर्व व्यवहारांमध्ये याचा वापर करता येईल. विशेष म्हणजे, ही सुविधा Android आणि iOS या दोन्ही प्लॅटफॉर्मवर उपलब्ध आहे. Android वापरकर्त्यांना फिंगरप्रिंटचा, तर iPhone वापरकर्त्यांना फेस आयडीचा पर्याय मिळणार आहे.

ही सुविधा सुरू करण्यासाठी ग्राहकांना iMobile अॅपमध्ये लॉगिन करून UPI सेटिंगमध्ये जावे लागेल. त्यानंतर संबंधित बँक खाते निवडून ‘Use biometric for payments’ हा पर्याय सुरू करावा लागेल. एकदा UPI PINद्वारे व्हेरिफिकेशन पूर्ण झाल्यानंतर बायोमेट्रिक सेटअप सक्रिय होईल.