donald trump : अमेरिकेचे राष्ट्राध्यक्ष डोनाल्ड ट्रम्प यांच्या टॅरिफ धोरणांमुळे जगात व्यापार युद्ध सुरू होण्याची भीती आहे. अशा परिस्थितीत अमेरिकेसाठी एक वाईट बातमी आली आहे. जागतिक रेटिंग एजन्सी मूडीजने अमेरिकेचे क्रेडिट रेटिंग AAA (सर्वात उच्च) वरून AA1 पर्यंत खाली आणले आहे. जगातील सर्वात मोठ्या अर्थव्यवस्थेसाठी हा एक मोठा धक्का मानला जात आहे. रेटिंग घटवल्यानंतर अमेरिकेकडून नाराजी व्यक्त होत आहे.
ट्रम्प यांच्या टॅरिफ धोरणांचा अमेरिकेला फटकाडोनाल्ड ट्रम्प यांनी 'अमेरिका फर्स्ट' चा नारा देत टॅरिफ धोरण पुढे नेले, पण दुसरीकडे अमेरिकेवरील कर्जाचा डोंगर वाढतच गेला. मूडीजने आपल्या अहवालात म्हटले आहे की अमेरिकेवरील कर्जाचा बोजा वाढत असून सरकार तसेच काँग्रेस त्यावर नियंत्रण ठेवण्यात अयशस्वी ठरले आहेत. वाढते कर्ज आणि त्यावरचे व्याज यामुळे अमेरिकेचे क्रेडिट रेटिंग AAA वरून AA1 पर्यंत कमी करण्यात आले आहे. हे अमेरिकेच्या वाढत्या कर्जावर नियंत्रण ठेवण्यात सरकारला आलेले अपयश दर्शवते.
अमेरिकेवर ३६ ट्रिलियन डॉलर्सहून अधिक कर्जरॉयटर्सच्या माहितीनुसार, अमेरिकेवरील कर्जाचा आकडा ३६.२ ट्रिलियन डॉलर्सपर्यंत पोहोचला आहे. मूडीजच्या म्हणण्यानुसार, या परिस्थितीतही डोनाल्ड ट्रम्प रिपब्लिकन-नियंत्रित काँग्रेसवर २०१७ मध्ये त्यांनी लागू केलेल्या कर कपातींना आणखी वाढवणारे विधेयक मंजूर करण्यासाठी दबाव आणत आहेत. रेटिंग एजन्सीच्या मते, जर असे झाले तर पुढील दशकात अमेरिकेचे कर्ज आणखी ४ ट्रिलियन डॉलर्सने वाढू शकते. डेमोक्रॅट्स मात्र याला विरोध करत आहेत.
मूडीजचा निर्णय ट्रम्प प्रशासनासाठी इशारामूडीजने क्रेडिट रेटिंग कमी केल्यावर प्रतिक्रिया देताना सिनेटमधील डेमोक्रॅटिक नेते चक शुमर म्हणाले की, मूडीजचा हा अहवाल म्हणजे ट्रम्प आणि रिपब्लिकन सदस्यांसाठी एक इशारा आहे. त्यांनी आता तरी तूट कमी करण्यासाठी कर कपात करण्याचा प्रयत्न थांबवावा.
बोस्टन कॉलेजमधील अर्थशास्त्रज्ञ ब्रायन बेथ्यून यांनी याला रिपब्लिकन पक्षासाठी मोठा इशारा म्हटले आहे. त्यांनी तूट कमी करण्यासाठी एक ठोस बजेट योजना आणायला हवी, असे ते म्हणाले. मात्र, डोनाल्ड ट्रम्प यांचे माजी आर्थिक सल्लागार स्टीफन मूर यांनी मूडीजच्या या निर्णयाला 'अपमानजनक' म्हटले आहे. त्यांच्या मते, जर अमेरिकेच्या सरकारी रोख्यांना AAA रेटिंग मिळत नसेल, तर आणखी कोणाला मिळेल?
व्हाईट हाऊसची मूडीजवर टीकाअमेरिकेच्या क्रेडिट रेटिंगमध्ये झालेल्या या बदलामुळे व्हाईट हाऊसमध्ये नाराजी पसरली आहे. त्यांनी मूडीजचा हा निर्णय पूर्णपणे नाकारला आहे. व्हाईट हाऊसने रेटिंग एजन्सीविरुद्ध आक्रमक भूमिका घेतली आहे. कम्युनिकेशन्स डायरेक्टर स्टीव्हन चेउंग यांनी सोशल मीडियावर मूडीजचे अर्थशास्त्रज्ञ मार्क झांडी यांच्यावर टीका केली आणि त्यांना डोनाल्ड ट्रम्प यांचे राजकीय विरोधक म्हटले. चेउंग म्हणाले की झांडी यांच्या विश्लेषणाला कोणीही गांभीर्याने घेत नाही आणि ते वारंवार चुकीचे ठरले आहेत.
एकंदरीत, मूडीजने अमेरिकेचे क्रेडिट रेटिंग कमी केल्याने अमेरिकेच्या अर्थव्यवस्थेवर आणि ट्रम्प यांच्या धोरणांवर प्रश्नचिन्ह उभे राहिले आहे. व्हाईट हाऊसने या निर्णयाला विरोध केला असला तरी, जगातील सर्वात मोठ्या अर्थव्यवस्थेसाठी ही निश्चितच एक चिंताजनक बाब आहे.
वाचा - Income Tax Return : 'सहज' आणि 'सुगम' फॉर्म म्हणजे काय? आयटीआर भरण्यापूर्वी जाणून घ्या
मूडीज संस्था काय आहे?मूडीज कॉर्पोरेशन (Moody's Corporation) ही एक अमेरिकन व्यवसाय आणि वित्तीय सेवा कंपनी आहे. मूडीज रेटिंग्ज ही एक जागतिक स्तरावर मान्यताप्राप्त क्रेडिट रेटिंग एजन्सी आहे. क्रेडिट रेटिंग एजन्सी कंपन्या, सरकारे आणि इतर संस्थांनी जारी केलेल्या कर्जाऊ रोख्यांची (debt securities) पत ठरवते. ही रेटिंग गुंतवणूकदारांना संबंधित संस्थेत गुंतवणूक करण्याच्या जोखमीचे मूल्यांकन करण्यास मदत करते. उच्च रेटिंग म्हणजे कमी धोका, तर कमी रेटिंग म्हणजे जास्त धोका. मूडीज जगातील तीन मोठ्या क्रेडिट रेटिंग एजन्सीपैकी एक आहे.