SBI, BoB, BoM..; कोणती बँक सर्वात स्वस्त पर्सनल लोन देते? ₹१० लाखांवर किती व्याज लागेल?

पर्सनल लोन घेताना कोणता पर्याय सर्वात स्वस्त ठरेल, हे जाणून घेणे महत्त्वाचे आहे.

Personal Loan: पर्सनल लोन घेण्याचा विचार करत असाल, तर स्टेट बँक ऑफ इंडिया (SBI), बँक ऑफ बडोदा (BoB) आणि बँक ऑफ महाराष्ट्र (BoM) हे पर्याय लोकप्रिय मानले जातात. मात्र, या बँकांच्या व्याजदर, प्रोसेसिंग फी आणि कर्जाच्या अटी वेगवेगळ्या असल्यामुळे त्याचा थेट परिणाम मासिक EMI वर होतो.

विशेषतः ₹१० लाखांचे पर्सनल लोन ५ वर्षांसाठी घेताना कोणत्या बँकेत EMI कमी येईल आणि कोणता पर्याय सर्वात स्वस्त ठरेल, हे जाणून घेणे महत्त्वाचे आहे. अर्थात, अंतिम व्याजदर आणि कर्ज मंजुरी ही सिबिल स्कोर, उत्पन्न आणि वय यावरही अवलंबून असते.

SBI चे पर्सनल लोन

स्टेट बँक ऑफ इंडिया (SBI) सध्या १०.०५% या सुरुवातीच्या व्याजदरावर पर्सनल लोन देत आहे. साधारणपणे ८०० किंवा त्यापेक्षा जास्त सिबिल स्कोर असलेल्या ग्राहकांना हे कर्ज सहज मिळू शकते. जर एखाद्या व्यक्तीने ₹१० लाखांचे पर्सनल लोन ५ वर्षांसाठी १०.०५% व्याजदराने घेतले, तर त्याचा मासिक EMI सुमारे ₹२१,२७२ इतकी येईल. या कालावधीत ग्राहकाला एकूण ₹२,७६,२९९ इतका व्याजाचा भरणा करावा लागेल.

बँक ऑफ बडोदा लोन ऑफर

बँक ऑफ बडोदा (BoB) सध्या १०.१५% या सुरुवातीच्या व्याजदरावर पर्सनल लोन उपलब्ध करून देत आहे. जर ग्राहकाने ₹१० लाखांचे कर्ज ५ वर्षांसाठी १०.१५% व्याजदराने घेतले तर त्याची मासिक EMI सुमारे ₹२१,३२१ इतकी येईल. या कर्जावर ग्राहकाला एकूण ₹२,७९,२५६ इतके व्याज भरावे लागेल.

बँक ऑफ महाराष्ट्रचा सर्वात स्वस्त पर्याय

बँक ऑफ महाराष्ट्र (BoM) सध्या ८.७५% या व्याजदरावर पर्सनल लोन देत आहे. बँकेच्या माहितीनुसार, हा सरकारी बँकांमधील सर्वात स्वस्त पर्सनल लोन पर्यायांपैकी एक मानला जातो. जर ग्राहकाने ₹१० लाखांचे कर्ज ५ वर्षांसाठी ८.७५% व्याजदराने घेतले, तर त्याची मासिक EMI सुमारे ₹२०,६३७ इतकी येईल. या कर्जावर एकूण ₹२,३८,२३४ इतके व्याज भरावे लागेल.

कोणता पर्याय ठरतो स्वस्त?

तिन्ही बँकांच्या तुलनेत बँक ऑफ महाराष्ट्र येथे व्याजदर कमी असल्यामुळे EMI आणि एकूण व्याजाचा भारही कमी येतो. त्यामुळे ₹१० लाखांच्या पर्सनल लोनसाठी हा पर्याय तुलनेने स्वस्त ठरू शकतो. मात्र, पर्सनल लोन घेण्यापूर्वी प्रत्येक बँकेचे व्याजदर, प्रोसेसिंग फी, प्रीपेमेंट चार्जेस आणि कर्जाच्या अटींची तुलना करणे आवश्यक आहे. तसेच चांगला सिबिल स्कोर असल्यास कमी व्याजदरावर कर्ज मिळण्याची शक्यता वाढते.