मुंबई : कापूरबावडी स्थित आणि बृहन्मुंबई महानगरपालिका अंतर्गत कार्यरत उपजल अभियंता (प्रचालने) या कार्यालयातील सर्व अधिकारी-कर्मचारीवृंद यांनी हिंदुहृदयसम्राट बाळासाहेब ठाकरे मध्य वैतरणा जलाशयाच्या पायथ्याशी वास्तव्यास असलेल्या आदिवासी बांधवांसमवेत दिवाळी सण साजरा केला.
सावरकूट, कोचाळे, विहिगाव तसेच जवळच्या इतर पाड्यावरील आदिवासी बांधवांना अधिकारी-कर्मचारी यांच्याकडून फराळ वाटप करण्यात आले. मागील सलग ६ वर्षांपासून या आदिवासी बांधवांसोबत दिवाळी साजरी करण्याची परंपरा महानगरपालिकेच्या अधिकारी-कर्मचाऱ्यांनी कायम ठेवली आहे.
हा उपक्रम यशस्वी करण्यासाठी कापूरबावडी येथील जल खात्यातील सर्व आजी-माजी कर्मचाऱ्यांनी आर्थिक हातभार लावला. खरोखर बंधने माणसाला असतात, माणुसकीला नाही, ही उक्ती सार्थ ठरवत गत ६ वर्षांपासून हा उपक्रम नियमितपणे सुरु आहे.