मुंबई : कुलाबा-वांद्रे-सीप्झ या भुयारी मेट्रो-३ च्या एकूण ३२ भुयारी टप्प्यांपैकी २२ वा भुयारी टप्पा शनिवारी पूर्ण करण्यात आला. गोदावरी २ या टनेल बोरिंग मशीनच्या मदतीने पॅकेज सहामधील विद्यानगरी ते छत्रपती शिवाजी महाराज आंतरराष्ट्रीय विमानतळ टी १ या स्थानकादरम्यान डाऊन लाइनच्या दिशेने २.८ किलोमीटरचे अंतर २ हजार ४८ रिंग्जच्या मदतीने पूर्ण करण्यात आले आहे, अशी माहिती मुंबईमेट्रो रेल कॉर्पोरेशनने दिली.
२२ आॅक्टोबर रोजी मुंबई मेट्रो रेल कॉर्पोरेशनने २१ वा भुयारी टप्पा पार केला होता. सूर्या २ या टनेल बोरिंग मशीनची यासाठी मदत घेण्यात आली. विधान भवन ते चर्चगेट या स्थानकांदरम्यान डाऊन लाइनच्या दिशेने ४८२ मीटर इतके अंतर ९० दिवसांत पूर्ण करण्यात आले होते. मेट्रो ३ चे ६५ टक्के भुयारीकरण १२ आॅक्टोबर रोजी पूर्ण करण्यात आले. धारावी येथे भुयारीकरणाचा २० वा टप्पा पार पडला. टनेल बोरिंग मशीन कृष्णा २ ची यासाठी मदत घेण्यात आली.पॅकेज ४ मधील ४ था टप्पा पूर्ण करताना नया नगर ते धारावी स्थानकांदरम्यानचे ५९० मीटर भुयारीकरण १३० दिवसांत पूर्ण करण्यात आले. ३ आॅक्टोबर रोजी भुयारीकरणाचा १९ वा टप्पा पार करण्यात आला. यासाठी सूर्या १ ची मदत घेण्यात आली. विधान भवन ते चर्चगेट स्थानकांदरम्यानचे ४९९ मीटर भुयारीकरण तब्बल ९० दिवसांत पूर्ण करण्यात आले.