मुंबई : विविध दुरुस्ती कामांसाठी रविवारी मध्य रेल्वे, हार्बर रेल्वे, पश्चिम रेल्वे मार्गावर मेगाब्लॉक घेण्यात येणार आहे.
मध्य रेल्वे मार्गावर मुलुंड-माटुंगा अप व डाउन जलद मार्गांवर सकाळी ९.२० ते दुपारी २.२० पर्यंत मेगाब्लॉक घेण्यात येणार आहे. छत्रपती शिवाजी महाराज टर्मिनस येथून सकाळी ८.५२ ते दुपारी १.५३ पर्यंत सुटणाऱ्या डाऊन जलद गाड्या माटुंगा येथे डाउन धिम्या मार्गावर वळविण्यात येतील. या गाड्या शीव ते मुलुंड दरम्यान सर्व स्थानकांवर थांबतील आणि नियोजित वेळेपेक्षा १५ मिनिटे उशिराने गंतव्यस्थानी पोहोचतील. जलद मार्गावरील गाड्या मुलुंड येथे डाउन जलद मार्गावर पुन्हा वळविण्यात येतील.
ठाणे येथून सकाळी ८.५५ ते दुपारी २.१३ या वेळेत सुटणाऱ्या अप जलद मार्गावरील गाड्या अप धिम्या मार्गावर वळविण्यात येतील व मुलुंड ते दादर दरम्यान सर्व स्थानकांवर थांबतील. परळ येथे या गाड्या अप जलद मार्गावर पुन्हा वळविण्यात येतील आणि नियोजित वेळेच्या १५ मिनिटे उशिराने गंतव्यस्थानी पोहोचतील.
छत्रपती शिवाजी महाराज टर्मिनस - चुनाभट्टी/वांद्रे डाउन हार्बर मार्गावर सकाळी ११.४० ते दुपारी ४.४० दरम्यान आणि चुनाभट्टी/वांद्रे - छत्रपती शिवाजी महाराज टर्मिनस अप हार्बर मार्गावर सकाळी ११.१० ते दुपारी ४.१० पर्यंत मेगाब्लॉक घेतला जाणार आहे.
छत्रपती शिवाजी महाराज टर्मिनस मुंबई येथून सकाळी ११.३४ ते दुपारी ४.४७ पर्यंत वाशी / बेलापूर / पनवेलसाठी डाउन हार्बर मार्गावरील सेवा व छत्रपती शिवाजी महाराज टर्मिनस येथून सकाळी ९.५६ ते दुपारी ४.४३ पर्यंत वांद्रे / गोरेगावकरिता सुटणाऱ्या डाउन हार्बर मार्गावरील सेवा बंद राहतील.
पनवेल / बेलापूर / वाशी येथून सकाळी ९.५३ ते दुपारी ३.२० या वेळेत छत्रपती शिवाजी महाराज टर्मिनस मुंबईसाठी सुटणाऱ्या आणि गोरेगाव / वांद्रे येथून सकाळी १०.४५ ते दुपारी ४.५८ या वेळेत छत्रपती शिवाजी महाराज टर्मिनस मुंबईसाठी सुटणाऱ्या अप हार्बर मार्गावरील सेवा बंद राहतील.
मेगाब्लॉक काळात पनवेल ते कुर्ला (प्लॅटफॉर्म क्रमांक ८) दरम्यान विशेष सेवा चालविल्या जातील. तसेच हार्बर मार्गावरील प्रवाशांना सकाळी १०.०० ते सायंकाळी ६.०० या वेळेत मध्य रेल्वे आणि पश्चिम रेल्वेमार्गे प्रवास करण्याची परवानगी आहे.
पश्चिम रेल्वे मार्गावर चर्चगेट ते मुंबई सेंट्रल दरम्यान अप आणि डाउन रेल्वे मार्गावर रविवारी सकाळी १०.३५ ते दुपारी ३.३५ दरम्यान मेगाब्लॉक घेतला जाणार आहे. या काळात चर्चगेट ते मुंबई सेंट्रल दरम्यान सर्व धिम्या गाड्या जलद मार्गावर वळविण्यात येणार आहेत. या काळात अप आणि डाऊन धिम्या मार्गावरील गाड्या रद्द करण्यात येणार आहेत.