हजर राहण्यासाठी वेळ वाढवून देण्यास नकार : टॉप्स ग्रुप आर्थिक गैरव्यवहार प्रकरण
लोकमत न्यूज नेटवर्क
मुंबई : शिवसेना आमदार प्रताप सरनाईक यांनी चाैकशीसाठी हजर राहण्यासाठी अंमलबजावणी संचालनालयाकडे आणखी १४ दिवसांची वेळ मागितली. तर त्यांचा मुलगा विहंगनेही सोमवारपर्यंत वेळ द्यावा, अशी विनंती ईडीकडे केली. मात्र दोघांचीही मागणी फेटाळण्यात आल्याचे सूत्रांनी सांगितले.
एमएमआरडीएच्या सुरक्षारक्षक घोटाळ्याप्रकरणी टॉप्स ग्रुप आणि विहंग ग्रुप यांच्यातील आर्थिक व्यवहाराच्या तपासणीसाठी ईडीकड़ून विहंग सरनाईक यांना ४ ते ५ वेळा समन्स बजाविण्यात आले. मात्र ते चौकशीला हजर राहिले नाहीत. त्यांनी शुक्रवारी पत्नी आजारी असल्याने सोमवारपर्यंत वेळ द्यावा, अशी विनंती केली. मात्र ईडीने त्यास नकार दिला.
आमदार प्रताप सरनाईक यांनी ते विलगीकरणात असल्याने पुढच्या आठवड्यात चौकशी करण्याची मागणी केली होती. त्यांचा विलगीकरणाचा कालावधी संपल्याने, त्यांनाही पुन्हा समन्स बजावत गुरुवारी चौकशीसाठी हजर राहण्यास सांगण्यात आले होते. मात्र ते गैरहजर राहिले. शुक्रवारी त्यांनी ईडीकडे आणखी १४ दिवसांची वेळ मागितल्याचे समजते. त्यांचीही मागणी ईडीने फेटाळल्याची माहिती सूत्रांनी दिली
............................