‘हॉटेलवर कधी येताय?’ मुकादमाकडून महिलेचा विनयभंग

आरोपीने महिलेला वारंवार लैंगिक संबंधाची मागणी करून पाठलागही केला

पुणे : महिलेसोबत अश्लील भाषेत बोलून तसेच अश्लील कृत्य करून विनयभंग केल्याचा प्रकार घडला आहे. या प्रकरणी मुकादम रोहिदास फुंदे (वय ५०, रा. चव्हाणनगर) आणि दिनेश सोनावणे (४०) यांच्याविरोधात सहकारनगर पोलिस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, याबाबत पद्मावती परिसरात राहणाऱ्या एका ३५ वर्षीय महिलेने पोलिसांना फिर्याद दिली आहे. हा प्रकार १९ ते २७ एप्रिल या दरम्यानच्या कालावधीत घडला आहे. फिर्यादी या तळजाई माता वसाहतीतील संभाजीनगर कोटी व लकडे दवाखाना येथे काम करत असताना आरोपी रोहिदास याने असभ्य भाषेत बोलण्यास सुरुवात केली. तसेच लैंगिक इशारे करून हॉटेलवर कधी येताय, असे बोलून फिर्यादींच्या मनास लज्जा उत्पन्न होईल असे कृत्य केले. तसेच तेथेच काम करणारा आरोपी दिनेश सोनावणे यानेही फिर्यादींना वारंवार लैंगिक संबंधाची मागणी करून पाठलाग केला. आरोपींच्या सततच्या त्रासाला कंटाळून महिलेने पोलिस ठाण्यात जबाब दिला आहे. या प्रकरणाचा पुढील तपास महिला पोलिस उपनिरीक्षक साळुंखे करत आहेत.