Kolhapur: नग्न फोटो पाठव नाहीतर ठार मारतो, तरुणीला धमकावणाऱ्यास अटक

सायबर, शाहूपुरी पोलिसांची सापळा रचून कारवाई, दोघे एकाच कॉलेजमधील

कोल्हापूर : कॉलेजमधील तरुणीच्या इन्स्टा अकाउंटवर अश्लील मेसेज करून, ‘नग्न फोटो पाठव नाहीतर तुला ठार मारतो’, असे धमकावणाऱ्या तरुणास सायबर आणि शाहूपुरी पोलिसांनी सापळा रचून अटक केली. अमरनाथ कृष्णा दफ्तरदार (वय २२, रा. गोकुळ शिरगाव, ता. करवीर) असे अटकेतील संशयिताचे नाव आहे. नागाळा पार्क येथे रविवारी (दि. १४) सायंकाळी सापळा रचून ही कारवाई करण्यात आली.

याबाबत अधिक माहिती अशी की, पीडित तरुणी आणि अमरनाथ दफ्तरदार हे दोघे एकाच महाविद्यालयात शिक्षण घेतात. अमरनाथ याने तिच्या इन्स्टा अकाउंटवर अश्लील मेसेज केले. याबाबत तरुणीने घरी नातेवाइकांना सांगितले. त्यानंतर नातेवाइकांनी संशयित अमरनाथ याची भेट घेऊन त्याची समजूत घातली होती. मात्र, त्यानंतरही इन्स्टा अकाउंटवरून अश्लील मेसेज पाठवणे आणि बदनामी करण्याचा प्रकार त्याने सुरूच ठेवला. तुझे नग्न फोटो पाठव, नाहीतर तुला ठार मारतो, असा धमकीचा मेसेज त्याने पाठवला होता.

त्याच्या त्रासाला कंटाळून पीडित तरुणीने सायबर पोलिस ठाण्यात तक्रार दिली. सायबर पोलिस आणि शाहूपुरी पोलिस ठाण्यातील निर्भया पथकाने पीडित तरुणीच्या मोबाइलवरून अमरनाथ याला फोन केला. भेटण्यासाठी त्याला नागाळा पार्कातील एका आईस्क्रीम पार्लरमध्ये बोलवून घेतले. त्यावेळी सापळा रचून त्याला अटक केली.

अधिक चौकशीत त्याने अश्लील मेसेज पाठवल्याची कबुली दिली. न्यायालयात हजर केले असता, त्याची गुरुवारपर्यंत (दि. १८) पोलिस कोठडीत रवानगी झाली. पोलिस निरीक्षक अजय सिंदकर यांच्यासह तानाजी चौगुले, निर्भया पथकातील नंदा सुतार, मनिषा गुरव, मनिषा मोंगल, स्मिता जाधव, शिवसेन पाटील, सायबरचे सागर माळवे, संगीता खोत आणि दिलीप पवार यांनी कारवाई केली.