जम्मूत श्रद्धासारखे हत्याकांड...डॉक्टर सुमेधा शर्माचा चाकू भोसकून खून; बॉयफ्रेंड महमूदविरोधात गुन्हा

होळीनिमित्त तरुणी बॉयफ्रेंडला भेटायला घरी गेली, तिथे त्याने चाकू भोसकला.

Jammu Kashmir Crime News : जम्मूमधून हत्येची एक धक्कादायक घटना समोर आली आहे. एका महिला डॉक्टरची तिच्याच प्रियकराने चाकू भोसकून हत्या केली. विशेष म्हणजे, तरुणाने प्रेयसीची हत्या केल्यानंतर स्वतःही आत्महत्येचा प्रयत्न केला. माहिती मिळताच पोलिसांनी धाव घेत जखमी तरुणाला रुग्णालयात दाखल केले. याप्रकरणी गुन्हा दाखल करण्यासोबतच तपास सुरू करण्यात आला आहे.

तलब टिल्लो (जम्मू) येथील डॉ. सुमेधा शर्मा आणि दोडा जिल्ह्यातील भदेरवाह येथील महमूद गनई यांचे एकमेकांवर प्रेम होते. महमूद आणि सुमेधा एकाच कॉलेजमध्ये शिकायला होते. दोघांनी जम्मूमधील डेंटल कॉलेजमधून बॅचलर ऑफ डेंटल सर्जरी (बीडीएस) केले. सध्या सुमेधा जम्मू-काश्मीरच्या बाहेरील कॉलेजमधून एमडीएस करत होती.

सुमेधा होळीच्या सुट्टीसाठी जम्मूमध्ये आली होती. यादरम्यान 7 मार्च रोजी ती जानीपूर येथे महमूदच्या घरी भेटायल गेली. तिथे त्यांच्यात काही कारणावरुन भांडण झाले, यादरम्यान महमूदने सुमेधाची चाकूने भोसकून हत्या केली आणि नंतर त्याच चाकूने आत्महत्या करण्याचा प्रयत्न केला. माहिती मिळताच पोलीस महमूदच्या घरी गेले. पोलिसांना सुमेधा यांचा मृतदेह रक्ताच्या थारोळ्यात पडलेला आढळून आला, तर आरोपीच्या पोटातही गंभीर जखमेच्या खुणा दिसल्या. पोलिसांनी दोघांनाही तातडीने रुग्णालयात दाखल केले.

कायदेशीर औपचारिकता पूर्ण करुन पोलिसांनी महिलेचा मृतदेह तिच्या कुटुंबीयांच्या ताब्यात दिला. आरोपीची प्रकृती चिंताजनक असून त्याच्यावर जम्मूच्या शासकीय वैद्यकीय महाविद्यालयात उपचार सुरू आहेत. पोलिसांनी भादंवि कलम 302 अन्वये खुनाचा गुन्हा दाखल केला आहे. याप्रकरणी पुढील तपास सुरू आहे. सध्या या प्रकरणाबाबत आरोपी आणि मृत तरुणीचे नातेवाईक मौन बाळगून आहेत.