Crime News: वृद्धाने केला मुलगा-सुनेचा खून, चाकूने गळा कापला आणि शांत झोपला, धक्कादायक कारण आलं समोर

Crime News: उत्तर प्रदेशमधील कानपूरमध्ये ७४ वर्षांच्या वृद्धाने त्याचा मुलगा आणि सुनेची गळा कापून हत्या केली. दरम्यान, या आरोपीला त्याने केलेल्या कृत्याबाबत कुठलाही खेद नाही आहे. आरोपीने बुधवारी रात्री साडे बारा वाजता या हत्या केल्या.

लखनौ - उत्तर प्रदेशमधील कानपूरमध्ये ७४ वर्षांच्या वृद्धाने त्याचा मुलगा आणि सुनेची गळा कापून हत्या केली. दरम्यान, या आरोपीला त्याने केलेल्या कृत्याबाबत कुठलाही खेद नाही आहे. आरोपीने बुधवारी रात्री साडे बारा वाजता या हत्या केल्या. आरोपीचा मुलगा आणि सून आयपीएलचा सामना पाहून झोपायला गेल्यावर या वृद्धाने धारदार चाकूने त्यांचा गळा कापला आणि अत्यंत क्रूरपणे त्यांची हत्या केली.

पोलिसांनी सांगितले की, आरोपीच्या घरामध्ये रोज वाद होत असत. तर आरोपीने आपण या हत्या का केल्या याचं कारण सांगू शकत नाही असे सांगितले. आरोपीच्य मुलाने गेल्यावर्षी एका सामुदायिक विवाह सोहळ्यात विवाह केला होता.

२७ वर्षीय शिवम आणि २५ वर्षांच्या ज्युलीने लग्नानंतर ज्या ज्येष्ठ व्यक्तीचे पहिले आशीर्वाद घेतले होते. तेच शिवमचे वडील दीप कुमार तिवारी हे या दोघांचे मारेकरी ठरले. त्यांनी मुलगा आणि सुनेची गळा कापून अत्यंत क्रूरपणे हत्या केली. आरोपीने सुरुवातीला गुन्हा लपवण्याचा खूप प्रयत्न केला. मात्र नंतर त्याने गुन्ह्याची कबुली दिली.

आरोपी दीप तिवारी मुलगा आणि सुनेसोबत बजरियामध्ये राहत होता. शिवम आणि जुली यांनी एक वर्षापूर्वी लव्ह मॅरेज केले होते. सुरुवातीला सारे काही व्यवस्थित होते. मात्र काही काळाने घरात पैशांवरून वाद सुरू झाले. त्याशिवाय काही इतर कारणंही होती. त्याबाबत आरोपीही स्पष्टपणे काही सांगत नाही आहे. दरम्यान, या दोघांचीही हत्या केल्यानंतर आरोपीने पाण्यामध्ये हात स्वच्छ धुवून घेतले. त्यानंतर दुसरीकडे जाऊन शांत झोपला. सकाळी हत्येची माहिती शेजाऱ्यांनी पोलिसांना दिली. तेव्हा पोलिसांनाही धक्का बसला. दरम्यान, आरोपी वडिलांकडे कसून चौकशी केल्यावर त्यांनी गुन्ह्याची कबुली दिली.