IPL 2024 KKR vs SRH, Qualifier 1 Live Marathi : गौतम गंभीरच्या मार्गदर्शनाखाली कोलकाता नाईट रायडर्सने इंडियन प्रीमिअर लीग २०२४च्या फायनलमध्ये प्रवेश केला. २०१४ नंतर पुन्हा एकदा त्यांना जेतेपद पटकावण्याची संधी मिळाली आहे. अहमदाबाद येथे झालेल्या क्वालिफायर १ सामन्यात KKR ने सनरायझर्स हैदराबादवर दणदणीत विजय मिळवला. २०२१ नंतर KKR फायनल खेळणार आहेत. हैदराबादला आता RR vs RCB यांच्यातल्या विजेत्या संघाविरुद्ध क्वालिफायर २ मध्ये खेळून फायनलमध्ये धडक देण्याची आणखी एक संधी मिळणार आहे.
आयपीएल २०२४ मध्ये गोलंदाजांसाठी कर्दनकाळ ठरलेले SRH ची फलंदाजी आज KKR समोर अपयशी ठरली. मिचेल स्टार्कने पहिल्या स्पेलमध्ये ३ विकेट्स घेऊन हैदराबादला बॅकफूटवर फेकले. ट्रॅव्हिस हेड सलग दुसऱ्या सामन्यात भोपळ्यावर परतला. ४ बाद ३९ अशा अवस्थेतून राहुल त्रिपाठी आणि हेनरिच क्लासेन यांनी ३७ चेंडूंत ६२ धावांची भागीदारी करून संघाला सुस्थितीत आणले होते. क्लासेन २१ चेंडूंत ३ चौकार व १ षटकारासह ३२ धावांवर बाद झाला. त्यात १३व्या षटकात त्रिपाठी ३५ चेंडूंत ७ चौकार व १ षटकारासह ५५ धावांवर रन आऊट झाला. त्यानंतर हैदराबादचा डाव पुन्हा गडगडला. कर्णधार पॅट कमिन्सने ३० धावांचे योगदान दिल्याने संघाला १९.३ षटकांत सर्वबाद १५९ धावांपर्यंत पोहोचता आले. स्टार्क ( ३-३४) याला वरुण चक्रवर्थी ( २-२६) याच्यासह वैभव अरोरा, हर्षित राणा, सुनील नरीन व आंद्रे रसेल यांनी प्रत्येकी १ विकेट घेऊन साथ दिली.
सुनील नरीन व रहमनुल्लाह गुरबाज यांनी KKR ला दमदार सुरुवात करून दिली आणि नशीबही त्यांच्याच बाजूने असल्याचे दिसले. SRH ने पहिल्या तीन षटकांत दोन्ही DRS गमावले आणि याने त्यांचे मनोबल खचले. टी नटराजनने चौथ्या षटकात संघाला यश मिळवून देताना गुरबाजला ( २३) माघारी पाठवले. KKR ला ३.२ षटकांत ४४ धावांवर पहिला धक्का बसला. KKR ने पॉवर प्लेमध्ये १ बाद ६३ धावा करून पाया मजबूत केला. सातव्या षटकात पॅट कमिन्सने शॉर्ट बॉलवर नरीनला ( २१) झेलबाद करून माघारी पाठवले. १०व्या षटकात
श्रेयस अय्यरचा झेल उडाला होता आणि हेनरिच क्लासेनने तो टिपलाही होता, परंतु राहुल त्रिपाठीही या झेल घेण्यासाठी पळाला आणि क्लासेनच्या हातून चेंडू निसटला. पुढच्याच षटकात ट्रॅव्हिस हेडने KKR कॅप्टनचा सोपा झेल टाकला.
![]()
श्रेयस अय्यर व वेंकटेश अय्यर यांनी KKR चा डाव सावरला. वेंकटेशने २८ चेंडूंत अर्धशतक पूर्ण केले. पाठोपाठ श्रेयसने ३ खणखणीत षटकार खेचून २३ चेंडूंत त्याचे अर्धशतक पूर्ण केले आणि १३.४ षटकांत संघाचा विजयही पक्का केला. कोलकातनने २ बाद १६४ धावा करून बाजी मारली. श्रेयस २४ चेंडूंत ५ चौकार व ४ षटकारांसह ५८ धावांवर नाबाद राहिला, तर वेंकटेशनेही २८ चेंडूंत ५ चौकार व ४ षटकारांसह नाबाद ५१ धावा केल्या. या दोघांनी तिसऱ्या विकेटसाठी ४४ चेंडूंत ९७ धावा झोडल्या.
Web Title: IPL 2024 KKR vs SRH, Qualifier 1 Live Marathi : Kolkata Knight Riders in Final, Gautam Gambhir's aggresive Celebration; Sunrisers Hyderabad have another chance
Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.
