मातीच्या भांड्यात करा स्वयंपाक, दूर होतील शारीरिक तक्रारी
आजकाल प्रत्येकाच्या घरात नॉनस्टीकच्या भांड्यांपासून ते स्टीलच्या भांड्यांपर्यंत अनेक भांडी सहज दिसून येतात. परंतु, या भांड्यांपेक्षा मातीच्या भांड्यांमध्ये स्वयंपाक करणं कधीही उत्तम.
मातीच्या भांड्यांमध्ये स्वयंपाक करण्याचे अनेक फायदे आहेत. म्हणूनच, या भांड्यांमधील जेवण जेवल्यामुळे शरीराला त्याचा कसा फायदा होतो ते पाहुयात.
मातीच्या भांड्यात अन्न शिजवून खाल्यास कुपोषणाचे प्रमाण कमी होऊ शकते. इतकंच नाही तर महिलांमधील अॅनिमिया तसेच खनिजांची कमतरताही दूर होते.
मातीच्या भांड्यात लोह, कॅल्शियम, मॅग्नेशियम आणि फॉस्फरस चांगल्या प्रमाणात असते त्यामुळे शरीरातील खनिजांची कमतरता दूर होण्यास याचा चांगला उपयोग होतो.
मातीच्या भांड्यात असणारे क्षार अन्नातील रसायनांवर प्रक्रिया करतात. त्यामुळे अन्नातील pH पातळी वाढते आणि अन्नाचे पोषण वाढण्यास मदत होते. म्हणून मातीच्या भांड्यात शिजवलेले अन्नपदार्थ अधिक पोषक ठरतात.
मातीच्या भांड्यात असणारी लहान छिद्र आग आणि ओलावा समान रीतीने सगळीकडे पसरण्यास मदत करतात ज्यामुळे अन्नातील पोषक तत्त्व सुरक्षित राहतात.