बविआ तालुकाध्यक्षावर बलात्काराचा गुन्हा

दहा वर्षापूर्वी जव्हार तालुका सेक्स स्कॅण्डलच्या घटनेने अवघ्या महाराष्ट्रात गाजला होता

जव्हार : कुटुंब उद्ध्वस्त करण्याची तसेच ठार मारण्याची धमकी देत वारंवार बलात्कार केल्याचा आरोप करत बहुजन विकास आघाडीचा जव्हार तालुकाध्यक्ष दत्तू यशवंत घेगड याच्यावर गुन्हा दाखल करण्यात आला आहे. एका महिलेच्या फिर्यादीवरून जव्हार पोलिसांनी ही कारवाई करत दत्तू घेगड यास अटक केली आहे. या घटनेने जव्हारच्या राजकीय वर्तुळात खळबळ उडाली आहे.

दहा वर्षापूर्वी जव्हार तालुका सेक्स स्कॅण्डलच्या घटनेने अवघ्या महाराष्ट्रात गाजला होता. त्यानंतर पुन्हा एका बलात्काराच्या घटनेने जव्हार शहरात खळबळ उडाली आहे. जव्हार पोलिसांनी दिलेल्या माहितीनुसार, दत्तू यशवंत घेगड याने जव्हार येथील आदिवासी मुलांच्या वसतिगृहात कामासाठी म्हणून असलेल्या एका ३६ वर्षीय महिलेस २०१७ पासून ठार मारण्याची आणि कुटुंब उद्ध्वस्त करण्याची धमकी देऊन शारीरिक संबंध ठेवत वेगवेगळ्या ठिकाणी बलात्कार केला आहे. अखेर पीडित महिलेने दिलेल्या फिर्यादीवरून दत्तू घेगड याला जव्हार पोलिसांनी बुधवारी रात्री अटक केली आहे. या घटनेची माहिती मिळताच उपविभागीय पोलीस अधिकारी भागवत सोनवणे जव्हार पोलीस ठाण्याला भेट दिली आहे. त्यांच्या मार्गदर्शनाखाली जव्हारचे पोलीस निरीक्षक आप्पासाहेब लेंगरे अधिक तपास करत आहेत. या घटनेबद्दल नागरिकांमधून मोठ्या प्रमाणात संताप व्यक्त होत आहे.