तरुणीचा होरपळून मृत्यू

वाशी : घरात गॅस गळती होऊन लागलेल्या आगीत वीस वर्षीय तरूणीचा होरपळून जागीच मृत्यू झाला. ही घटना येथील काॅलेज रोडलगत असलेल्या घुमटाचा फड भागात सोमवारी दुपारी तीन वाजण्याच्या सुमारास घडली. याप्रकरणी वाशी पोलीस ठाण्यात अकस्मात मृत्यूची नोंद झाली आहे.

येथील सारिका सदाशिव क्षीरसागर (वय २०) ही सोमवारी दुपारी तिच्या घरात असताना घरातील गॅस सिलिंडरची गळती झाली. दुपारी तीन वाजण्याच्या सुमारास स्वयंपाक बनविण्यासाठी तिने गॅसची शेगडी पेटविली असता अगोदरच खोलीमध्ये जमा झालेल्या गॅसमुळे मोठा भडका उडाला. यामध्ये सारिकासह खोलीमध्ये असलेल्या कपड्यांनी पेट घेतला. यावेळी खोलीमधून प्रचंड धूर निघू लागल्याने आजूबाजूच्या नागरिकांनी खोलीचा पत्रा काढून खोलीमध्ये पाणी टाकून आग विझविण्याचा प्रयत्न केला. मात्र, यात सारिकाचा होरपळून जागीच मृत्यू झाला. यावेळी उपस्थित नागरिकांच्या सतर्कतेमुळे सिलिंडरचा स्फोट टळला.

घटनेची माहिती मिळताच पोलिसांनी घटनास्थळाचा पंचनामा करून मृतदेह शवविच्छेदनासाठी येथील ग्रामीण रुग्णालयात पाठविला. डॉ. विजयकुमार सूळ यांनी शवविच्छेदन केले. याप्रकरणी वाशी पोलिसात आकस्मिक मृत्यूची नोंद करण्यात आली असून, तपास सपोनी संजीव निरगुडे करीत आहेत.