"शिवसेना को हराना मुश्किल ही नही, नामुमकिन है"; बदलापूरच्या सभेत एकनाथ शिंदेंचा एल्गार 

आज उपमुख्यमंत्री एकनाथ शिदेंनीही विकासकामांचा पाढा वाचत भाजपवर थेट टीका करणे टाळले. त्यामुळे स्थानिक पातळीवर प्रचाराचा स्तर खालावला असला तरी वरिष्ठांनी मात्र युती धर्म पाळल्याचे दिसून येत आहे. 

अंबरनाथ: शिवसेना को हराना मुश्किल नही, नामुमकिन है, असे सांगत बदलापुरात शिवसेनेचाच नगराध्यक्ष विजयी होईल असा विश्वास उपमुख्यमंत्री एकनाथ शिंदे यांनी बदलापूरच्या सभेत व्यक्त केला. विरोधकांनी कितीही टीका केली तरी त्याकडे दुर्लक्ष करा, आपण टीकेला कामाने उत्तर देऊ असा सल्लाही त्यांनी शिवसेना शहरप्रमुख वामन म्हात्रे यांना दिला. बदलापूरमध्ये शिवसेना आणि भाजपमध्ये राजकारण चांगलंच तापले आहे. दोन्ही पक्षाच्या नेत्यांकडून आरोप-प्रत्यारोपांच्या फैरी झडतायेत. मात्र गुरूवारी झालेला भाजपच्या सभेत मुख्यमंत्री देवेंद्र फडणवीस यांनी शिवसेनेवर थेट टीका करणे टाळले होते.

आज उपमुख्यमंत्री एकनाथ शिदेंनीही विकासकामांचा पाढा वाचत भाजपवर थेट टीका करणे टाळले. त्यामुळे स्थानिक पातळीवर प्रचाराचा स्तर खालावला असला तरी वरिष्ठांनी मात्र युती धर्म पाळल्याचे दिसून येत आहे. 

बदलापूरमधील बदल पाहून विरोधकांच्या पायाखालची वाळू सरकली आहे. माझ्याकडे नगरविकास खाते, बदलापूरच्या विकासासाठी निधी कमी पडून देणार नाही. बदलापूरसाठी पोशीर आणि शिलार धरण बनवणार. त्यासोबत मेट्रो 5 बदलापूरला आणणार हा आपला शब्द आहे असेही शिंदे म्हणाले. 

रेड लाईन-ब्लू लाईनचा प्रश्न मार्गी लावणार. त्यासाठी आपले प्रयत्न देखील सुरू असून त्यावर जलद गतीने काम देखील केले जात आहे येत्या काळात हा प्रश्न कायमस्वरूपी मार्गी लागेल, असेही शिंदे म्हणाले.