बार्शीच्या शिवाजी महाविद्यालयास भारत सरकारचा स्टार स्टेट्स सन्मान

महाविद्यालयास २०१७ -१८ ते २०१९-२० या तीन वर्षांच्या कालावधीसाठी महाविद्यालयातील विज्ञान व तंत्रज्ञान विषयक बाबींच्या सशक्तीकरणासाठी ६९ लाख रुपयांचे अनुदान जैवतंत्रज्ञान विभाग, विज्ञान व तंत्रज्ञान मंत्रालयाकडून प्राप्त झाले होते. या अनुदानाच्या माध्यमातून महाविद्यालयाने राबविलेले विविध उपक्रम, विद्यार्थ्यांमध्ये वृद्धिंगत झालेली गुणवत्ता, वैज्ञानिक दृष्टिकोन या बाबींचे मूल्यांकन जैवतंत्रज्ञान विभागाच्या समितीकडून केले.

त्यास अनुसरून या समितीने महाविद्यालयाची निवड ‘स्टार स्टेट्स’ पुरस्काराच्या सादरीकरणासाठी केली. त्यानुसार महाविद्यालयाचे सादरीकरण ऑनलाइन पद्धतीने जैवतंत्रज्ञान विभागाच्या कार्यबल गटासमोर २५ ऑगस्ट २०२० रोजी केले होते. सादरीकरणानंतर कार्यबल गटाने केलेल्या शिफारशीनुसार श्री शिवाजी महाविद्यालयास ९ डिसेंबर रोजी ‘स्टार स्टेट्स’ या पुरस्काराने सन्मानित करण्यात आले.

महाविद्यालयास या उपक्रमांतर्गत पुढील तीन वर्षांसाठी एक कोटी ८९ लाख रुपयांचे अनुदान मंजूर झाले आहे. या अनुदानाच्या माध्यमातून महाविद्यालयातील रसायनशास्र, सूक्ष्मजीवशास्र, भौतिकशास्र, विजाणूशास्र, प्राणिशास्र आणि वनस्पतीशास्र या विभागांना आधुनिक प्रयोगशाळा साहित्य प्राप्त होणार आहे.

तसेच या अनुदानातून महाविद्यालयामार्फत विद्यार्थी, शिक्षक आणि शिक्षकेतर कर्मचारी यांच्यासाठी शिबिरे, कार्यशाळा आणि विविध वैज्ञानिक उपक्रम राबविले जाणार आहेत. याबद्दल संस्थेचे अध्यक्ष डॉ. बी.वाय. यादव, उपाध्यक्ष नंदकुमार जगदाळे, सचिव व्ही. एस. पाटील, सह सचिव पी. टी. पाटील, खजिनदार दिलीप रेवडकर यांनी प्राचार्य डॉ. प्रकाश थोरात, स्टार कॉलेज उपक्रमाचे समन्वयक डॉ. व्ही. एम. गुरमे, सर्व विभागप्रमुख, शिक्षक, शिक्षकेतर सेवक यांचे काैतुक केले.