Sangli Accident: टेम्पोने चिरडल्याने ऊसतोड मजुराच्या मुलीचा मृत्यू, मजुराचे कुटुंब धुळ्याचे

उसाच्या शेताकडेला रस्त्यावर खेळत होती

सांगली : उसाच्या शेताकडेला रस्त्यावर खेळणाऱ्या ऊसतोड मजुराच्या मुलीचा वाहनाखाली चिरडून मृत्यू झाला. ही घटना गुरुवारी (दि. २७) सायंकाळी पाच वाजता पद्माळे (ता. मिरज) येथे घडली.

दिदी अनिल पवार (वय १ वर्ष, मूळ गाव - चॉंदतारा गल्ली, साखरी, जि. धुळे. सध्या रा. मौजे डिग्रज, ता. मिरज) असे चिमुकल्या बालिकेचे नाव आहे. याप्रकरणी सांगली ग्रामीण पोलिस ठाण्यात वाहन चालक कैलास प्रकाश रोकडे (वय ३५, रा. बहे, ता. वाळवा) याच्याविरोधात गुन्हा दाखल झाला. मुलीचे वडील अनिल प्रवीण पवार यांनी फिर्याद नोंदविली. 

दीदी शेतात झाडाखाली खेळत असताना भरधाव वेगाने जाणाऱ्या मालवाहू चारचाकीने तिला धडक दिली. त्यातच तिचा मृत्यू झाला. पद्माळेमध्ये आकाश तानाजी जाधव यांच्या गट क्रमांक ४७ या शेतात अनिल पवार आणि त्यांची पत्नी योगिता हे ऊसतोडीसाठी गेले होते. त्यावेळी त्यांची तीन मुले गुड्डू, आदी आणि दिदी हे ऊसतोड करणाऱ्या अन्य कामगारांच्या मुलांसोबत शेताच्या कडेला नारळाच्या झाडाखाली खेळत होते. 

पाच वाजण्याच्या सुमारास कैलास रोकडे हा चारचाकी (एमएच १३ एएक्स ७६६६) भरधाव वेगाने तेथून चालवत निघाला होता. त्यामध्ये उसाचे वाडे भरले होते. वाहनाने शेताकडेला खेळत असलेल्या दिदीला धडक दिली. त्यात ती गंभीर जखमी होऊन घटनास्थळीच मृत्यू झाला. पोलिसांनी कैलास विरोधात भारतीय न्याय संहिता १०६(१), २८१, १२५(ब) व वाहन कायद्यानुसार गुन्हा नोंदविला आहे.