महापालिका क्षेत्रावर पुन्हा लॉकडाऊनचे सावट
By लोकमत न्यूज नेटवर्क | Published: June 25, 2021 04:20 AM2021-06-25T04:20:29+5:302021-06-25T04:20:29+5:30
सांगली : कोरोना संसर्ग रोखण्यासाठी प्रशासनाकडून उपाययोजना करण्यात येत असल्या तरी महापालिका क्षेत्रात रुग्णसंख्या वाढत आहे. निर्बंध शिथिल केल्यानंतर ...
सांगली : कोरोना संसर्ग रोखण्यासाठी प्रशासनाकडून उपाययोजना करण्यात येत असल्या तरी महापालिका क्षेत्रात रुग्णसंख्या वाढत आहे. निर्बंध शिथिल केल्यानंतर शहरातील गर्दी वाढत आहे. दोन दिवसांत रुग्णसंख्या कमी न आल्यास महापालिका क्षेत्रात पुन्हा एकदा कडक निर्बंध लागू करण्यात येतील, असा इशारा जिल्हाधिकारी डॉ. अभिजित चौधरी यांनी गुरुवारी दिला.
महापालिका क्षेत्रातील पॉझिटिव्हिटी रेट २० टक्क्यांपर्यंत पाेहोचल्याने लॉकडाऊनचे सावट गडद झाले आहे.
जिल्ह्यात कोरोनाची दुसरी लाट अद्याप सुरू असून, शासनाने दिलेल्या निर्देशानुसार तिसऱ्या स्तरातील नियमावली लागू करण्यात आली आहे. त्यानुसार दुपारी चारपर्यंत सर्व व्यवहारांना मुभा देण्यात आली आहे. त्यामुळे शहरात गर्दी वाढली आहे. चारपर्यंत वेळ असतानाही अनेक ठिकाणी सायंकाळी उशिरापर्यंत दुकाने सुरू राहत असल्याने गर्दीही कायम राहत आहे. यामुळेच पॉझिटिव्हिटी रेटही २० टक्क्यांपर्यंत गेला आहे.
गेल्या तीन दिवसांपासून महापालिका क्षेत्रात पुन्हा एकदा रुग्णसंख्या वाढत चालली आहे. सरासरी दोनशेवर रुग्ण सापडत असून पॉझिटिव्हिटी रेटही वाढला आहे. राज्यात एकीकडे कोरोनाला उतार लागला असताना महापालिका क्षेत्रात रुग्णसंख्या वाढतच चालल्याने प्रशासनाने याची गंभीर दखल घेतली आहे. त्यानुसार रुग्णसंख्या कमी न आल्यास चौथ्या स्तरातील निर्बंध महापालिका क्षेत्रात लागू करण्यात येतील, असा इशारा जिल्हाधिकाऱ्यांनी दिला आहे.
चौकट
नियम पाळा, अन्यथा निर्बंध
कोरोनाचे संकट अद्यापही टळलेले नसून दुसरी लाट सुरूच आहे. दोन-तीन दिवसांपासून महापालिका क्षेत्रात रुग्ण संख्या वाढती आहे. कोरोनाचे नागरिकांना गांभीर्य नसल्याचे चित्र असून नियमांचे पालन हाेताना दिसून येत नाही. त्यामुळे शहरातील शिथिलता बंद करून कडक निर्बंध लागू करण्यात येतील. गर्दी टाळावी, तसेच लक्षणे आढळल्यास तत्काळ चाचणी करून घ्यावी, असे निर्देश जिल्हाधिकारी डॉ. चौधरी यांनी दिले आहेत.