अर्धनग्न फोटो काढून ब्लॅकमेल करत महिलेचा केला विनयभंग

पुणे : सिंहगड रस्त्यावरील एका घरात केअर टेकर म्हणून काम करत असताना एका व्यक्तीने महिलेचे गुपचूप अर्धनग्न फोटो काढून त्याद्वारे ब्लॅकमेल करून विनयभंग केल्याचा धक्कादायक प्रकार समोर आला आहे. याप्रकरणी दत्तवाडी पोलिस ठाण्यात एका ४५ वर्षाच्या महिलेने फिर्याद दिली आहे. त्यानुसार अनुप संजय केनकर (वय ३७, रा. जुनी सांगवी) याच्यावर गुन्हा दाखल केला आला आहे.

पोलिसांनी दिलेल्या प्राथमिक माहितीनुसार, फिर्यादींचे वडिल वयस्कर असून त्यांच्या सेवेसाठी त्यांनी एका नर्सिंग ब्युरोच्या केनकर याला केअरटेकर म्हणून कामास ठेवले होते. गेल्या महिन्यात एके दिवशी फिर्यादी महिला रात्रीच्या सुमारास गोळी खाऊन फ्लॅटचा दरवाजा न लावता झोपल्या होत्या. त्यावेळी आरोपीने गुपचूप महिलेचे अर्धनग्न फोटो व व्हिडीओ काढले. त्यानंतर ते फोटो व व्हिडिओ फिर्यादींना दाखवून त्यांच्याशी जबरदस्ती करण्याचा प्रयत्न केला. तसेच, हे अश्लील फोटो फिर्यादींच्या बहिणीला पाठविले. इतरांना देखील हे फोटो पाठविण्याची धमकी दिली. याप्रकारामुळे तक्रारदार महिला घाबरल्या होत्या. त्यानंतर त्यांनी पोलिसात धाव घेत तक्रार दाखल केली. महिलेने दिलेल्या तक्रारीनुसार गुन्हा दाखल करून दत्तवाडी पोलिसांनी आरोपीचा शोध सुरू केला आहे.

दरम्यान मागील एक महिन्यापुर्वी कोथरुड परिसरात मध्यरात्री शस्त्राचा धाक दाखवत नर्सिंग ब्युरोच्या केअर टेकरने एका वृद्ध दाम्पत्याला लुटल्याचा प्रकार समोर आला होता. त्यामुळे बोगस नर्सिंग ब्युरोला आळा घालण्याची गरज असल्याचे दिसून येते.