Pune Corona News: सोमवारी शहरात कोरोनाबधितांची संख्या पन्नासच्या आत

सोमवारी रविवारच्या तुलनेत नव्या कोरोनाबधितांची संख्या निम्म्याहून कमी झाली आहे

पुणे : शहरात दिवाळीनंतर कोरोना संख्या वाढलेली असताना, सोमवारी रविवारच्या तुलनेत नव्या कोरोनाबधितांची संख्या निम्म्याहून कमी झाली आहे. आज दिवसभरात केवळ ४८ नवे रुग्ण आढळून आले असून, दिवसभरात ४ हजार ८१ जणांची तपासणी करण्यात आली. तपासणीच्या तुलनेत ही टक्केवारी १.१७ टक्के आहे.

पुणे महापालिकेच्या आरोग्य विभागाने दिलेल्या माहितीनुसार, सोमवारी सायंकाळी चारपर्यंत ५४ जण कोरोनामुक्त झाले आहेत. तर आज ३ जणांचा मृत्यू झाला असून, यापैकी २ जण पुण्याबाहेरील आहेत. शहरातील सक्रिय रुग्णसंख्या ७५९ झाली आहे.
 
आजपर्यंत ३६ लाख २० हजार ४३५ जणांची तपासणी करण्यात आली असून, यापैकी ५ लाख ५ हजार ४११ जण कोरोनाबाधित आढळून आले आहेत. तर यापैकी ४ लाख ९५ हजार ५६७ जण कोरोनामुक्त झाले आहेत. सध्या ९७ कोरोनाबाधित गंभीर असून, ७४ जणांवर ऑक्सिजनसह उपचार सुरू आहेत. आतापर्यंत ९ हजार ८५ कोरोनाबाधितांचा मृत्यू झाला आहे.