Accident: चाकण - आंबेठाण रस्त्यावर गाडीच्या धडकेत दोन युवकांचा जागीच मृत्यू; एक गंभीर जखमी

अपघात झाल्यानंतर पळून जाणाऱ्या पिकअप चालकास नागरिकांनी पकडून पोलिसांच्या ताब्यात दिले. 

चाकण : भरधाव पीकअप गाडीने दुचाकीस जोरदार धडक दिल्याने झालेल्या अपघातात दोन युवकांचा जागीच मृत्यू तर एक जण गंभीर जखमी झाल्याची घटना ( दि.८) चाकण - आंबेठाण रस्त्यावर कोरेगाव फाटा येथे घडली. अपघात झाल्यानंतर पळून जाणाऱ्या पिकअप चालकास नागरिकांनी पकडून पोलिसांच्या ताब्यात दिले. 

केतन माणिकराव धोंडगे (वय.१९ वर्षे ) आणि विलास आनंदराव घुले (वय.२२ वर्षे, दोघेही रा.झित्राईमळा, चाकण, ता.खेड) अशी अपघातात मृत्यू झालेल्या दोन युवकांची नावे आहेत, तर गोरख जकाते ( रा.झित्राईमळा,चाकण) हा या अपघातात गंभीर जखमी झाला आहे. या प्रकरणी राहुल पोपट वाळूंजकर ( रा.बहुरगाव , मावळ ) या पिकअप चालकावर महाळुंगे पोलिसांत गुन्हा दाखल करण्यात आला आहे.

आंबेठाण - वराळे रस्त्याने गोरख जकाते याच्या दुचाकीवरून तिघे औद्योगिक वसाहतीतील एका कंपनीत कामावर जात होते. आंबेठाण गावाच्या हद्दीत राजमुद्रा ट्रेडर्स समोर भरधाव वेगात आलेल्या पिकअप जीपने दुचाकीस धडक दिली. या अपघातात केतन धोंडगे व विलास घुले हे दोन्ही युवकांचा जागीच मृत्यू झाला. तर गोरख जकाते गंभीर जखमी झाला आहे. अपघातानंतर पीकअप जीप चालक तसाच पुढे भरधाव वेगात निघून जात असताना आंबेठाण गावाच्या जवळ नागरिकांनी त्याला पकडून पोलिसांच्या ताब्यात दिले. महाळुंगे पोलीस चौकीचे पोलीस उपनिरीक्षक दिनेश चव्हाण अधिक तपास करीत आहेत.