मोकाट पिसाळलेल्या कुत्र्याचा १० ते १२ नागरिकांना चावा; दौंड तालुक्यातील घटना

नागरिकांनी घाबरून न जाता सतर्क राहण्याचे, काळजी घेण्याचे आवाहन सरपंचांनी केले आहे

पाटेठाण : राहू (ता.दौंड) येथे सोमवार (दि.२७) रोजी पासून मोकाट पिसाळलेल्या अवस्थेत फिरत असलेल्या कुत्र्याने आज मंगळवारी रात्रीच्या सुमारास हिंसक रुप धारण केले असून गावठाण तसेच महात्मा फुले चौक, समतानगर परिसरात रस्त्यावरुन चालणाऱ्या दहा ते बारा नागरिकांना चावा घेत धुमाकूळ घातला आहे.

मंगळवार (दि.२८) रोजी सांयकाळी साडेसातच्या सुमारास पिसाळलेल्या कुत्र्याने रस्त्यावरून चालणाऱ्या लोकांवर हल्ला चढवून गंभीर जखमी केले. राहू येथील प्राथमिक आरोग्य केंद्रात दहा ते बारा लोकांवर इंजेक्शन देऊन प्रथमोपचार करण्यात आले असल्याची माहिती वैद्यकीय अधिकारी डॉ.मोहन पांढरे यांनी दिली आहे. याचबरोबर राहूच्या सिनर्जी हॉस्पिटल, गुरुकृपा हॉस्पिटल, लोकमान्य हॉस्पिटल, चैतन्य हॉस्पिटल येथेही पिसाळलेल्या कुत्र्याने चावा घेतलेल्या काही लोकांवर उपचार करण्यात येत आहेत. मिळालेल्या माहितीनुसार काही जखमींना ससून येथे उपचारासाठी पाठविण्यात आले आहे. नागरिकांनी घाबरून न जाता सतर्क राहण्याचे, काळजी घेण्याचे अवाहन सरपंच दिलीप देशमुख यांनी केले आहे.