“तुझ्या मायनं दूध पाजलं असेल तर...”; शिवसेना आमदार संजय गायकवाडांची भाजपा आमदाराला धमकी

Shivsena Sanjay Gaikwad: देवेंद्र फडणवीस यांच्यावर केलेल्या वादग्रस्त टीकेनंतर पुन्हा एकदा शिवसेना आमदार संजय गायकवाड यांची जीभ घसरली आहे.

ठळक मुद्देमी फक्त यावर वस्तूस्थिती मांडली तर माझा पुतळा जाळण्यात आला. पण माझा यात दोष काय?राज्यातील जनतेला मरणाच्या दारात सोडत असाल तर मी जी भावना मांडली ती चुकीची आहे का? राज्यातील लोक मरू लागले आणि तुम्ही आंदोलन करताय. लोक मरत आहेत त्याला जबाबदार तुम्ही आहात

बुलढाणा – शिवसेना आमदार संजय गायकवाड आणि भाजपा नेत्यांमधला कलगीतुरा चांगलाच रंगला आहे. यातच शिवसेना आमदार संजय गायकवाड यांची पुन्हा एकदा जीभ घसरली आहे. भाजपाचे संजय कुटेसारखा तीनपाट आमदार दिवसभर दारू पिऊन वावरात पडलेला असतो. माझा पुतळा काय जाळतो, हिंमत असेल तर माझ्यासमोर येऊन दाखव. मग मी काय आहे ते दाखवतो अशी धमकी आमदार संजय गायकवाड यांनी दिली आहे.

संजय गायकवाड यांनी व्हिडीओ काढून म्हटलंय की, राज्यात शिवसेनेचा मुख्यमंत्री आणि काँग्रेस-राष्ट्रवादी महाविकास आघाडीचं सरकार आहे म्हणून केंद्राकडून रेमडेसिवीर, ऑक्सिजनचा पुरवठा होत नाही. मी फक्त यावर वस्तूस्थिती मांडली तर माझा पुतळा जाळण्यात आला. पण माझा यात दोष काय? देशातील सर्व लोक एकाच पक्षाचे आहेत का? राज्यात मुख्यमंत्री आपला नाही म्हणून अडवणूक करता. राज्यातील जनतेला मरणाच्या दारात सोडत असाल तर मी जी भावना मांडली ती चुकीची आहे का? असा सवाल त्यांनी उपस्थित केला आहे.

तसेच संजय कुटेसारखे आमदार दारू पिऊन वावरात पडलेले असतात. त्याला सर्व शौक आहे तो मवाली आहे. तुझ्या मायनं दूध पाजलं असेल तर ५० मीटर माझ्या जवळ येऊन दाखव तुला संजय गायकवाड काय आहे ते दाखवतो अशी धमकी शिवसेना आमदार संजय गायकवाड यांनी दिली आहे. माझ्याविरोधात तक्रार काय देता? मीच तुमच्याविरोधात तक्रार करतो. राज्यातील लोक मरू लागले आणि तुम्ही आंदोलन करताय. लोक मरत आहेत त्याला जबाबदार तुम्ही आहात असा आरोपही संजय गायकवाड यांनी केला आहे.  

देवेंद्र फडणवीसांवर केली होती टीका

 'तुमच्या सरकारमुळे लाखो लोक मरतील त्याचं काय? ज्याचा घरातला माणूस मरतो, ज्याच्या घरात जीव जातो, त्याला समजतं की कोरोना काय आहे? मला कोरोनाचे जंतू सापडले असते तर मी देवेंद्र फडणवीसांच्या तोंडात कोंबून टाकले असते असं विधान संजय गायकवाड यांनी केले होते.

देवेंद्र फडणवीसांचे चोख प्रत्युत्तर

’संजय गायकवाड यांची रात्रीची उतरली नसताना पत्रकार परिषद घेतली असावी. मात्र मी त्यांना विनंती करतो की, माझ्या घशात कोरोनाचे किटाणू घालण्याआधी त्यांनी हँड ग्लोज घालावेत आणि चेहऱ्यावर नीट मास्क लावावा. कारण काय आहे की, मला जनतेचे आशीर्वाद आहेत. त्यामुळे मला काही होणार नाही. मात्र माझ्या माहितीप्रमाणे सामान्य माणसापेक्षा तळीरामांना कोरोना लवकर होतो असा टोला विरोधी पक्षनेते देवेंद्र फडणवीसांनी लगावला आहे.