चालक शौचास गेल्यानंतर चोरट्यांनी पळविला ट्रक

वाहनचोरट्यांनी पोलिसांना गुंगारा देत धुमाकूळ घातला..

ठळक मुद्देफिर्यादी यांच्या मालकीचा सहा लाख रुपये किमतीचा 14 टायरचा ट्रक केला गायब

पिंपरी : शहरात वाहनचोरट्यांचा सुळसुळाट आहे. वाहनचोरीचे प्रकार रोखण्याचे पोलिसांसमोर आव्हान आहे. त्यामुळे पोलिसांकडून उपाययोजना देखील करण्यात येत आहेत. मात्र तरीही वाहनचोरट्यांनी पोलिसांना गुंगारा देत धुमाकूळ घातला आहे. त्यामुळे दुचाकी, तीनचाकी, चारचाकी वाहने चोरीचे प्रकार सातत्याने वाढत असतानाच आता अवजड वाहन असलेल्या ट्रक ट्रेलरला चोरट्यांनी पळवून नेल्याचा प्रकार समोर आला आहे.

बहालसिंग मेजरसिग बल (वय 50, रा. कळंबोली, पनवेल, जि. रायगड) यांनी याप्रकरणी तळेगाव दाभाडे पोलीस ठाण्यात फिर्याद दिली आहे. त्यानुसार अज्ञात चोरट्याविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी बल यांच्या मालकीचा सहा लाख रुपये किमतीचा 14 टायरचा ट्रक ट्रेलर घेऊन चालक सोहनलाल शर्मा हा मंगळवारी (दि. 14) पुण्यातून मुंबईच्या दिशेने जात होता. त्यावेळी झोप आली म्हणून सोमाटणे (ता. मावळ) गावच्या हद्दीत एका पेट्रोलपंपसमोर त्याने ट्रक ट्रेलर थांबविला. झोपला असताना त्याच्या पोटात कळ आल्याने पहाटे साडेतीनच्या सुमारास चालक शर्मा शौचास गेला. त्यावेळी त्यावेळी अज्ञात चोरट्योन त्यांचा सहा लाखांचा ट्रक ट्रेलर चोरून नेला. परत आल्यानंतर शर्मा याला ट्रक ट्रेलर दिसून आला नाही. त्यामुळे त्याने शोधाशोध केली. तसेच ट्रक ट्रेलरचे मालक फिर्यादी बल यांना याबाबत फोनवरून माहिती दिली. त्यांनी तळेगाव दाभाडे पोलिसांकडे तक्रार दिली. पोलीस उपनिरीक्षक बाजगिरे तपास करीत आहेत.