धक्कादायक! इराणने स्वत:च्याच युद्धनौकेवर मिसाईल डागले; 19 नौसैनिकांचा मृत्यू

अमेरिकेसोबतच्या वाढत्या तणावामुळे इराण सध्या ओमानच्या खाडीमध्ये ताबा मजबूत ठेवण्यासाठी मोठ्या प्रमाणावर नौसेना अभ्यास करत आहे. याच मोहिमेतून इराणने कोनारक युद्धनौकेला तैनात केले होते.

ओमानच्या खाडीमध्ये युद्धाभ्यास सुरु असताना इरानने चुकून आपल्याच युद्धनौकेवर मिसाईल डागली. यामध्ये १९ नौसैनिकांचा मृत्यू झाला असून अन्य काही जण गंभीर जखमी झाले आहेत.

इराणच्या सरकारी टीव्ही चॅनलने या दुर्घटनेची पुष्टी केली आहे. ही घटना रविवारी तेहरानच्या दक्षिण पूर्वमध्ये जस्क बंदराजवळ घडली.

ज्या युद्धनौकेवर हे मिसाईल डागले गेले ती युद्धनौका हेंडिजन क्लासची कोनारक होती. मिसाईल फुटल्याने ही नौका उद्ध्वस्त झाली आहे.

इराणच्या मिडीयाने मिसाईलच्या लक्ष्यापासून खूप जवळ असल्याने युद्धनौका दुर्घटना ग्रस्त झाल्याचे म्हटले आहे.

अमेरिकेसोबतच्या वाढत्या तणावामुळे इराण सध्या ओमानच्या खाडीमध्ये ताबा मजबूत ठेवण्यासाठी मोठ्या प्रमाणावर नौसेना अभ्यास करत आहे. याच मोहिमेतून इराणने कोनारक युद्धनौकेला तैनात केले होते.

कोनारक ही नौका हॉलंडकडून १९८८ मध्ये खरेदी करण्यात आली होती. या नौकेला २०१८ मध्येच अद्ययावत करण्यात आले होते. या जहाजाची लांबी ४७ मीटर होती. यामध्ये २० नौसैनिक राहू शकत होते.

या युद्धनौकेचा वापर इराण आखातात गस्त घालण्यासाठी देखील करत होता.

या भागात अमेरिकेच्याही युद्धनौका तैनात आहेत. या भागात अमेरिकेची ५ वी फ्लीट तैनात करण्यात आली आहे.

जगातील २० टक्के समुद्री तेल हे होरमुजच्या खाडीतून नेले जाते. याच भागात इराण आपली ताकद वाढविण्यासाठी नौसेनेचा सराव घेत आहे.

काही महिन्यांपूर्वी ब्रिटनच्या तेलवाहू जहाजांवर मिसाईल हल्ला झाला होता. हा हल्ला इराणनेच केल्याचा आरोप झाला होता.