पॉपॉय बनण्यासाठी केलेला 'भलताच' प्रयोग अंगाशी; तरुणाचा जीव धोक्यात

पॉपॉय दिसण्यासाठी तरुणानं शरीरात पेट्रोलियम जेली इंजेक्ट केली. त्यामुळे आता तरुणाला प्रचंड वेदना होत असून त्याच्या जीवाला धोका निर्माण झाला आहे.

नव्वदीच्या दशकात अनेक उत्तमोत्तम कार्टून्स छोट्यांच्या भेटीला आली. या कार्टून्स बच्चे कंपनीचं मनोरंजन केलं. त्यातलंच एक कार्टून म्हणजे पॉपॉय-द सेलर मॅन.

सामर्थ्यवान आणि चतुर पॉपॉय अनेक लहानग्यांचा आवडता. पालक खाऊन पॉपॉय शत्रूशी दोन हात करायचा. पॉपॉयचे फुगलेले दंड, बेटकुळ्या पाहून बच्चे कंपनीला मजा यायची.

रशियातल्या किरिल्ल टेरेशिनलादेखील पॉपॉय आवडायचा. आपणदेखील पॉपॉयसारखं दिसावं यासाठी किरिल्लनं एक प्रयोग केला. आता हा प्रयोग त्याच्या चांगलाच अंगाशी आला आहे.

किरिल्ल टेरेशिनचे दंड अगदी पॉपॉयसारखे आहेत. त्यामुळे अनेक जण त्याच्यासोबत फोटो काढतात. पॉपॉयसारख्या बेटकुळ्या हीच किरिल्लची ओळख आहे. मात्र आता हीच ओळख त्याच्यासाठी जीवघेणी ठरण्याची शक्यता आहे.

दंड पॉपॉयसारखे दिसावेत यासाठी किरिल्लनं त्यात इंजेक्शनच्या मदतीनं पेट्रोलियम जेली घातली. त्यानंतर किरिल्लचे दंड सुजत गेले. त्याची परिस्थिती बिघडत गेली.

सध्याच्या घडीला किरिल्ल उपचार घेत आहे. किरिल्लची प्रकृती पाहता त्याला दंड गमवावे लागू शकतात. परिस्थिती बिघडल्यास त्याला जीवदेखील गमवावा लागू शकतो.

पेट्रोलियम जेलीच्या मदतीनं दंड फुगवल्यानंतर किरिल्ल त्याच्या परिसरात ओळखला जाऊ झाला. २०१९ मध्ये त्यानं त्याच्या दंडात ३ लीटर पेट्रोलियम जेली इंजेक्ट केली.

यानंतर किरिल्लचे दंड फुगले. पॉपॉयसारखे दंड असल्यानं किरिल्ल लोकल सेलिब्रिटी झाला. अनेक जण त्याच्यासोबत फोटो काढायचे. मात्र हळूहळू किरिल्लची प्रकृती खालावू लागली.

किरिल्ल सध्या २४ वर्षांचा आहे. त्याचे बायसेप्स २४ इंचाचे आहेत. सध्या त्याची स्थिती गंबीर आहे. यातून बाहेर पडण्यासाठी त्याच्यावर शस्त्रक्रिया करावी लागेल.

दंडामध्ये पेट्रोलियम जेली इंजेक्ट आयुष्यातील मोठी चूक होती, असं किरिल्लनं म्हटलं. आपल्या एका चुकीचं परिणाम आता भोगावे लागत असल्याची व्यथा त्यानं मांडली.