Gold : सरकारनं घेतला निर्णय; आता 'या' तारखेपासून Hallmarking होणार अनिवार्य

Gold Hallmarking : यापूर्वी सोन्यावरील हॉलमार्किंग १ जूनपासून करण्यात येणार असल्याचं म्हटलं होतं.

काही दिवसांपूर्वी सरकारनं १ जूनपासून देशात हॉलमार्किंग (Hallmarking) अनिवार्य करण्याचे निर्देश दिले होते. परंतु आता हॉलमार्किंगसाठी तारीख बदलण्यात आली आहे.

आता १५ जूनपासून सोन्यावर हॉलमार्किंग करणं बंधनकारक करण्याचा निर्णय घेण्यात आला आहे. याचाच अर्थ १५ जूनपासून सर्व ज्वेलर्स हॉलमार्किंग असलेलंच सोनं विकू शकतील.

यापूर्वी हा नियम १ जूनपासून लागू करण्यात येणार होता. परंतु देशात कोरोनाच्या दुसऱ्या लाटेमुळे (Second wave of corona) हाहाकार माजला आहे. या पार्श्वभूमीवर हा नियम लागू करण्याची तारीख पुढे ढकलण्यात आली आहे.

यापूर्वी सोन्याच्या व्यापाराशी निगडीत असलेल्या लोकांनी सरकारला हॉलमार्किंग लागू करण्याची तारीख पुढे ढकलण्याची विनंती केली होती.

सध्या कोरोनाच्या वाढत्या प्रादुर्भावाच्या पार्श्वभूमीवर सरकारनं त्यांची मागणी मान्य केली आहे. तसंच यासाठी नवी व्यवस्था तयार करण्यासही व्यापाऱ्यांना वेळ मिळणार आहे.

१५ जूनपासून दागिन्यांची विक्री करण्याच्या नव्या व्यवस्थेसाठी एक समिती स्थापन करणयात आली होती. ही समिती हॉलमार्किंगशी निगडीत समस्यांचं निराकरण करणार आहे.

ग्राहकांना वेळ न दवडता हॉलमार्क प्रमाणित सोन्याचीच विक्री केली पाहिजे, असं मत रेल्वे आणि वाणिज्य मंत्री पीयूष गोयल (Piyush Goyal) यांनी व्यक्त केलं. याशिवाय त्यांनी सोन्याच्या विक्रीच्या नव्या व्यवस्थेशी निगडीत तयारींचीही माहिती घेतली.

देशात हॉलमार्किंग लागू करण्याची तारीख यापूर्वीही बदलण्यात आली होती. ही यापूर्वी जानेवारी महिन्यात लागू करण्यात येणार होती. परंतु त्यानंतर कोरोनाच्या पार्श्वभूमीवर ही तारीख पुन्हा पुढे ढकलण्यात आली होती.

यानंतर पुन्हा एकदा आता ही तारीख पुढे ढकलण्यात आली असून आता १५ तारखेला हॉलमार्किंग अनिवार्य करण्यात आलं आहे. यावेळी देशात वाढत असलेल्या करोनाच्या पार्श्वभूमीवर हा निर्णय घेण्यात आला आहे.

हॉलमार्किंग ग्राहकांसाठी फायद्याचं आहे. जर तुम्ही हॉलमार्क असलेलं सोनं खरेदी केलं तर तुम्हाला कोणत्याही प्रकारची डेप्रिसिएशन कॉस्ट (depreciation cost) लागत नाही. याचाच अर्थ तुम्हाला सोन्याची पूर्ण किंमत परत मिळते.

याशिवाय तुम्ही जे सोनं खरेदी कराल त्याच्या गुणवत्तेची (Quality) हमी दिली जाईल. तसंच यामुळे देशात भेसळयुक्त सोन्याच्या विक्रीस प्रतिबंध होईल. यामुळे ग्राहकांची फसवणूकही होण्याची शक्यता नाही.