आठ टनाने घटली प्राणवायूची मागणी

परभणी : कोरोनाबाधित रुग्णांसाठी लागणाऱ्या ऑक्सिजनची मागणी ८ टनाने घटली आली असून, सध्या रुग्णांना दररोज १२ टन ऑक्सिजनची आवश्यकता भासत आहे.

मागील तीन महिन्यांपासून कोरोनाचा संसर्ग जिल्हावासीयांना त्रस्त करीत आहे. बाधित रुग्णांची संख्या झपाट्याने वाढत असल्याने या रुग्णांवर उपचार करताना आरोग्य यंत्रणेला मोठा त्रास सहन करावा लागला. एप्रिल महिन्यात जिल्ह्यात सर्वाधिक रुग्णांची नोंद झाली आहे. याच काळात जिल्ह्यात ऑक्सिजनची मागणी मोठ्या प्रमाणात वाढली. गंभीर रुग्णांना ऑक्सिजन पुरवठा करताना प्रशासनाला तारेवरची कसरत करावी लागली होती. एप्रिल महिन्यात जिल्ह्याला दररोज २० टन ऑक्सिजनची आवश्यकता भासत होती. याच काळात ऑक्सिजनचा तुटवडा निर्माण झाल्याने रुग्ण आणि त्यांच्या नातेवाईकांची ऑक्सिजन खाटांसाठी मोठी धावपळ झाली. दरम्यान, सध्या कोरोनाचा संसर्ग कमी झाला असून, जिल्ह्याची ऑक्सिजनची मागणी २० टनावरून १२ टनांवर पोहोचली आहे. त्यामुळे प्रशासनाने सुटकेचा नि:श्वास सोडला आहे.

शहरातील जिल्हा सामान्य रुग्णालय, आयटीआय कोविड हॉस्पिटल आणि जिल्हा परिषदेच्या नवीन इमारतीतील कोविड रुग्णालयात ऑक्सिजन खाटा उपलब्ध असून, या ठिकाणी आतापर्यंत सरासरी ३ के एल ऑक्सिजन दिवसाकाठी लागत होते. ही मागणी आता १.५ के एल वर आली आहे. याशिवाय खाजगी रुग्णालयातही ऑक्सिजनची मागणी घटली असल्याची माहिती प्रशासनाने दिली.

ऑक्सिजनच्या ४२६ खाटा रिक्त

कोरोना रुग्णांची संख्या वाढली तशी ऑक्सिजनची मागणीही वाढली होती. ही बाब लक्षात घेता आरोग्य विभागाने अतिदक्षता विभागात ६०८ आणि आयसीयुच्या बाहेर ४९७ ऑक्सिजन खाटांची निर्मिती केली. सुमारे ११०५ ऑक्सिजन खाटा जिल्ह्यात उपलब्ध आहेत. सध्या आयसीयू आणि आयसीयू बाहेरील ऑक्सिजन खाटांवर ६२० रुग्ण उपचार घेत आहेत. याशिवाय व्हेंटिलेटरवर ५९ रुग्णांवर उपचार सुरू आहेत. जिल्ह्यामध्ये सद्यस्थितीला ४२६ ऑक्सिजन खाटा रिक्त आहेत.

ऑक्सिजन प्रकल्पाचा मोठा आधार

येथील जिल्हा परिषदेच्या कोविड रुग्णालयात ऑक्सिजन निर्मितीचा प्रकल्प उभारण्यात आला आहे. या प्रकल्पात हवेपासून ऑक्सिजनची निर्मिती केली जात आहे. हा प्रकल्प कार्यान्वित झाला असून, जिल्हा परिषदेच्या कोविड रुग्णालयात या प्रकल्पावरून ६० खाटांसाठी ऑक्सिजन उपलब्ध करून दिला जात आहे. एका रुग्णाला १० लिटर प्रति मिनिट ऑक्सिजनचा पुरवठा या प्रकल्पाच्या माध्यमातून केला जात आहे. प्रकल्प उभारल्याने ५० खाटांसाठी बाहेरून होणारा ऑक्सिजन पुरवठा आता बंद झाला आहे.