Neeraj Chopra : सुवर्णपदक विजेत्या नीरज चोप्रानं पुन्हा उंचावली भारताची मान; जाणून तुम्हालाही वाटेल अभिमान!

टोकियो ऑलिम्पिक स्पर्धेत सुवर्णपदक जिंकून डौलानं तिरंगा फडकावणाऱ्या नीरज चोप्रानं पुन्हा एक उल्लेखनीय कामगिरी केली आहे. भालाफेकपटू नीरजनं टोकियोत ८७.५८ मीटर लांब भालाफेक करून सुवर्णपदक पटकावले. भारताच्या ऑलिम्पिक स्पर्धा इतिहासातील १२५ वर्षांतील हे अॅथलेटिक्समधील पहिलेच पदक ठरले. दिवंगत मिल्खा सिंग व पी टी उषा यांची ऑलिम्पिक पदक जिंकण्याची संधी थोडक्यात हुकली होती. पण, नीरजनं हे स्वप्न पूर्ण केलं. २००८नंतर पहिल्यांदा ऑलिम्पिक स्पर्धेत राष्ट्रगीत वाजले. 

सुवर्णपदक विजेत्या नीरजनं जागतिक भालाफेक क्रमवारीत १४ स्थानांनी झेप घेताना थेट दुसरा क्रमांक पटकवला आहे. ( India’s Neeraj Chopra to move up 14 places to second place in the latest World Athletics Rankings) त्याच्या खात्यात आता १३९५ गुण जमा झाले असून जर्मनीचा जोहानेस वेट्टर हा १३९६ गुणांसह अव्वल स्थानावर आहे. विशेष म्हणजे वेट्टरला ऑलिम्पिकच्या फायनलमध्ये नवव्या क्रमांकावर समाधान मानावे लागले होते. मार्सिन क्रुकोवस्की ( १३०२) तिसऱ्या, टोकियोत रौप्यपदक जिंकणारा जाकूब व्हॅड्लेजच ( १२९८०) चौथ्या आणि ज्युलियन वेबर ( १२९१) पाचव्या क्रमांकावर आहे.