वाशीत कारची रिक्षाला धडक

नवी मुंबई : पाम बीच मार्गावर वाशी येथे वेगवान कारने रिक्षाला धडक दिल्याची घटना शुक्रवारी सकाळी घडली. यामध्ये दोघे जण गंभीर जखमी झाले असून त्यांच्यावर रुग्णालयात उपचार सुरू आहेत. त्या ठिकाणी सिग्नल असतानाही वेगात वाहने पळवली जात असल्याने सातत्याने अपघाताच्या घटना घडत आहेत.

पाम बीच मार्गावर वाशी सेक्टर १७ येथे येथील सिग्नलच्या ठिकाणी हा अपघात घडला. एक रिक्षा (एमएच ४३ बी एफ ६४१९) सिग्नल ओलांडत असतानाच वेगवान कार (टी.एन. ०१ एक्यू १५४२)ने तिला धडक दिली. अपघाता वेळी दोन्ही वाहने वेगात होती. त्यामुळे कारच्या धडकेनंतर रिक्षा पलटी होऊन त्यामधील चालकासह एक जण गंभीर जखमी झाला.

अपघातानंतर प्रत्यक्षदर्शींनी तत्काळ त्यांना जवळच्या रुग्णालयात दाखल केले. तर अपघाताची माहिती मिळताच वाशी पोलीस व वाहतूक पोलिसांनी घटनास्थळी धाव घेऊन अपघातग्रस्त वाहने रस्त्यावरून हटवली. रात्री उशिरापर्यंत अपघातप्रकरणी गुन्हाची नोंद करण्यात आली नव्हती.