धक्कादायक, पंतप्रधान नरेंद्र मोदींचे कार्यालय OLXवर काढले विक्रीला, एवढी लावली किंमत

Narendra Modi Office News : नरेंद्र मोदींचे संसदीय कार्यालय चक्क ओएलएक्सवर विक्रीस टाकल्याचे उघडकीस आले आहे

ठळक मुद्देया कार्यालयाची छायाचित्रे घेऊन ती वस्तूंची पुनर्विक्री करणारी साईट असलेल्या ओएलएक्सवर अपलोड करण्यात आली या कार्यालयाची विक्रीसाठीची किंमत साडे सात कोटी एवढी सांगण्यात आलीहा प्रकार समजताच पोलिसांनी संबंधित जाहिरात ओएलएक्सवरून हटवली

नवी दिल्ली - पंतप्रधान नरेंद्र मोदी हे त्यांचा लोकसभा मतदारसंघ असलेल्या वाराणसीचा नियमितपणे दौरा करत असतात. मात्र याच वाराणसीमधून एक धक्कादायक माहिती समोर आली आहे. काही कुरापतखोर व्यक्तींनी पंतप्रधान नरेंद्र मोदींचे वारणसीमधील संसदीय कार्यालय चक्क ओएलएक्सवर विक्रीस टाकल्याचे उघडकीस आले आहे.

पंतप्रधान मोदींच्या वारणसीमधील या कार्यालयाची छायाचित्रे घेऊन ती वस्तूंची पुनर्विक्री करणारी साईट असलेल्या ओएलएक्सवर अपलोड करण्यात आली. तसेच या कार्यालयाची विक्रीसाठीची किंमत साडे सात कोटी एवढी सांगण्यात आली. तसेच कार्यालयाच्या आतील सुविधा, खोल्या, पार्किंग यांचीही माहिती ओलएलएक्सवरील या जाहिरातीमधून देण्यात आली.

दरम्यान, हा प्रकार समजताच पोलिसांनी संबंधित जाहिरात ओएलएक्सवरून हटवली. तसेच ही जाहिरात ज्या व्यक्तीने ओएलएक्सवर टाकली होती. त्यांनाही पोलिसांनी अटक केली आहे. एकूण चार जणांना ताब्यात घेण्यात आले असून, त्यापैकी एकाला अटक करण्यात आली आहे, असे पोलिसांनी सांगितले.

OLX पर शरारती तत्वों द्वारा पीएम के संसदीय कार्यालय को बेचने हेतु दिये गये विज्ञापन के सम्बन्ध में #SSP_VNS@amitpathak09 की बाईट @Uppolice@dgpup@adgzonevaranasi@IgRangeVaranasi@AmarUjalaNews@Live_Hindustan@TOIIndiaNews@htTweetspic.twitter.com/oXLwh34oyM

— Varanasi Police (@varanasipolice) December 18, 2020

पंतप्रधान नरेंद्र मोदी यांनी आपल्या लोकसभा मतदारसंघात हे कार्यालय सुरू केले आहे. येथे स्थानिक जनता आपल्या समस्या घेऊन येत असते. हे कार्यालय वाराणसीमधील भेलूपूर पोलीस ठाण्याच्या हद्दीतील जवाहरनगर एक्स्टेंशनमध्ये आहे. पंतप्रधान मोदी नियमितपणे आपल्या मतदारसंघातील जनतेच्या संपर्कात असतात. त्याशिवाय अनेक कार्यक्रमांमध्ये ते व्हिडीओ कॉन्फ्रन्सिंगच्या माध्यमातून सहभागी होत असतात.