पालिका निवडणुकीचे पडघम, विरोधकांनी भरला दम

नितीन बोरसे, सटाणा : पालिका निवडणुकीचे बिगुल वाजले आणि झोपलेले पुढारी जागे झाले अशी अवस्था आज शहराची आहे. निवडणुकीच्या पार्श्वभूमीवर मूलभूत सोयी-सुविधांसाठी कोणी उपोषण, कोणी आत्मदहनाचे इशारे देऊन सत्ताधाऱ्यांना कोंडीत पकडण्याचा प्रयत्न करीत आहेत. तर सत्ताधारी विरोधकांचे आरोप खोडण्याचा. ऐन पावसाळ्यात सुरू असलेल्या या चिखलफेकमुळे राजकीय वातावरण तापू लागले आहे.

गेल्या निवडणुकीत सटाणा गावचे ‘सोनवणे’ विखुरले गेल्यामुळे बिगर सोनवणे मंडळीने करिष्मा दाखवला. गेल्या वेळच्या थेट नगराध्यक्ष पदाच्या निवडणुकीत अपक्षासह चार प्रमुख पक्षांनी मैदानात उतरण्याचा निर्णय घेतला होता. भाजपच्या वतीने माजी नगराध्यक्ष बाळासाहेब सोनवणे, काँग्रेसकडून विजय पाटील, सेनेकडून अरविंद सोनवणे, राष्ट्रवादीकडून बाळासाहेब रौंदळ तर अपक्ष सुनील मोरे यांनी शहर विकास आघाडी उभी करून आव्हान दिले. वतनदार सोनवणे असलेले तिघे उमेदवार एकाच भाऊकीतले. मराठा चार उमेदवार यांच्या मतविभागणीचा फायदा घेत मोरे यांनी अल्पसंख्याकांची मोट बांधून अलगदपणे पालिकेची सत्ता हस्तगत करून अनेक स्वयंघोषित पुढाऱ्यांची झोप उडविली. त्यानंतर आमनेसामने लढलेल्या भाजपनेदेखील सत्तेचा मोह न टाळता मोरेंशी युती करून सत्तास्थापन केली. गेल्या पावणे पाच वर्षाच्या अनेक वेळा पुलाखालून पाणी वाहून गेले. मोरेंनी भाजपशी केलेल्या युतीचा फायदा घेत शहरासाठी पुनदसारख्या महत्त्वाकांक्षी पाणीपुरवठा योजना मंजूर करण्यासाठी सातत्याने पाठपुरावा केला. ही योजना आता अंतिम टप्प्यात आहे. रिंग रोड, देवमामलेदार यशवंतराव महाराज स्मारक अशा भरीव कामांना निधी पदरात पाडून घेतला. असे असताना भाजपाच्या काही नगरसेवकांनी आपल्याला विश्वासात घेत नसल्याचा आरोप करून बगावत करण्याचा प्रयत्न केला. आजच्या घडीला त्यांनी मोरेंशी काडीमोड घेतला. आगामी निवडणुकीत हीच मंडळी मोरेंसाठी डोकेदुखी ठरणार आहे.

विरोधकांकडून मोरेंची नाकेबंदी..

शहर पाणीपुरवठा योजनेच्या वाढीव खर्चाबाबत शासनाच्या मुन्फ्रामार्फत कर्ज उभारणीच्या प्रस्तावावरून राष्ट्रवादी काँग्रेसने नगराध्यक्ष मोरे यांना लक्ष केले आहे . हा प्रस्ताव बेकायदेशीर असून तो रद्द करून संबंधित कामाची चौकशी करावी या मागणीसाठी करून कोंडी केली आहे. राष्ट्रवादीच्या नगरसेविका सुरेखा बच्छाव, भाजपाचे आरिफ शेख यांनी आपल्या प्रभागात मूलभूत सुविधा पुरविल्या जात नसल्याने त्यांनी उपोषणाचे हत्यार उपसून मोरे यांच्या कार्यक्षमतेवर प्रश्न चिन्ह उपस्थित केले. राज्यात सेना, काँग्रेस, राष्ट्रवादी यांची आघाडी असली तरी आगामी काळात प्रत्येक पक्षातील महत्त्वाकांक्षी कार्यकर्त्यांमुळे आजच्या घडीला तरी आघाडीची शक्यता कमी आहे. तर सुनील मोरे यांनी पुन्हा शहर विकास आघाडीचा नारा दिला आहे. त्यामुळे भाजपला आपली स्वतंत्र ताकद दाखवावी लागणार आहे. त्यामुळे आगामी काळात पंचरंगी लढत अटळ आहे.

कोट...

गेल्या पावणे पाच वर्षात माझ्या शहरवासीयांना दिलेल्या जाहीरनाम्याची पूर्तता केल्याचा मला आनंद आहे. पुनद पाणीपुरवठा योजना, रिंग रोड, देवमामलेदार यशवंतराव महाराज स्मारक, नानानानी पार्क ही भरीव कामे पूर्ण केले आहे. आगामी काळात शहराचा कायापालट करण्यासाठी विविध योजना राबविल्या जातील.

- सुनील मोरे, नगराध्यक्ष

कोट....

मागच्या काळात मंजूर झालेली ही कामे असल्यामुळे कोणी त्याचे श्रेय घेऊ नये. शहरात डासांचे साम्राज्य असल्यामुळे डेंग्यू, चिकुनगुनियासारख्या आजरांनी थैमान घातले आहे. याला पालिका प्रशासन जबाबदार आहे.

- राहुल पाटील, विरोधी पक्षनेते

फोटो- २७ राहुल पाटील

२७ सटाणा पालिका

270821\27nsk_12_27082021_13.jpg~270821\27nsk_13_27082021_13.jpg

२७ सटाणा पालिका ~फोटो- २७ राहूल पाटील