धोकादायक ! अचानक मृत झालेल्या ४०० कोंबड्या फेकल्या उघड्यावर; नागरिकांचे आरोग्य धोक्यात

नांदेड जिल्ह्यातील किनवट तालुक्यातील झळकवाडी गावात चारशे कोंबड्याचा मृत्यू झाला आहे.

ठळक मुद्देमरण पावलेल्या कोंबड्यांमध्ये आळ्या लागल्या आहेत गावाभोवती अशी दुर्गंधी पसरली आहे.

नांदेड- किनवट आदिवासी दुर्गम भागातील झळकवाडी या गावामध्ये  चारशे कोंबड्या चा मृत्यू झाल्याने खळबळ उडाली आहे. या मृत कोंबड्या गावाच्या जवळच टाकल्याने त्याची गावाभोवती दुर्गंधी पसरली असून या दुर्गंधीमुळे गावातील नागरिकांचे आरोग्य देखील धोक्यात येण्याची शक्यता नाकारता येत नाही.

राज्यातील शहरी व ग्रामीण भागात बर्ड फ्ल्यू आजाराचा वाढता प्रादुर्भाव पाहता शासनाने शहरी व गाव पातळीवर काम करणाऱ्या पशुसंवर्धन विभागाला अलर्ट राहण्याचे आदेश देखील दिले आहेत. मात्र अद्याप पर्यंत या गावांमध्ये कुठलाही पशुसंवर्धन विभागाचा अधिकारी किंवा साधा कर्मचारी देखील फिरकला नाही.  त्यामुळे या गावात कोंबड्यांची मृत्यू संख्या कमी होण्याऐवजी दिवसेंदिवस वाढत असून दिवसाकाठी कोंबड्यांचे मृत्यू वाढतच आहेत.त्यामुळे मृत्यु पडलेल्या कोंबड्या गावाच्या शेजारी रोडच्या कडेला फेकून दिल्याने मरण पावलेल्या कोंबड्यांमध्ये आळ्या लागून गावाभोवती अशी दुर्गंधी पसरली आहे.

जवळपास या गावातील चारशे कोंबड्याचा मृत्यू झाल्याची माहिती येथील नागरीक व सरपंच दामाजी तांबारे यांनी दिली आहे. दरम्यान दोन दिवसांपूर्वी हिमायतनगर तालुक्यात शंभरहुन अधिक कोंबड्यांचा मृत्यू झाला होता. त्यानंतर अनेक तालुक्यातील कोंबड्या आणि कावळ्याचे नमुने भोपाळ येथे तपासणी साठी पाठविण्यात आले आहेत.