साथ जीने मरने की कसमें खाल्ली अन् दुसरीशीच साखरपुडा उरकला.. तरुणीचा आत्महत्येचा प्रयत्न

लॉंग-डिस्टन्स रिलेशनशिपमधला हा दुरावा आधीच तिला सहन होत नव्हता त्यात सागरने दिलेल्या धोक्याने आगीत तेल ओतल्याचे काम केले. हा धोका सहन न झाल्याने तरुणीने झोपेच्या गोळ्या खाऊन स्वत:ला संपवण्याचा प्रयत्न केला. 

ठळक मुद्देलॉंग-डिस्टन्स रिलेशनशिप झाली फेल

नागपूर : प्रेमात धोका मिळाल्याचा ताण सहन न झाल्याने तरुणीने आत्महत्येचा प्रयत्न केला. हा प्रकार वेळीच लक्षात आल्याने तिला रुग्णालयात दाखल करण्यात आले. सध्या तरुणीची प्रकृती धोक्याबाहेर असून याप्रकरणी पोलिसांनी गुन्हा दाखल केला आहे.

सागर सतिश सदाफल (वय ३०) आणि २८ वर्षीय तरुणी आधी दोघेही एकाच महाविद्यालयात शिकत होते. एकाच भागात राहत असल्याने त्यांचे एकमेकांच्या घरी जाणे येते होते. दोघेही एकाच गाडीवर कॉलेजला जायचे. हळूहळू मैत्रीतून प्रेम फुलत गेले. दोघांनी लग्नाच्या आणाभाका घेतल्या, घरच्यांना सांगितले. घरच्यांनीही नोकरी लागताच दोघांचे लग्न लावून देण्याचे मान्य केले. सर्वकाही सुरळीत सुरू होतं.

दोघांनाही नोकरी लागली. सागर शासकीय नोकरीत असून युवती खासगी कंपनीत आहे. दोघेही अभियंता आहेत. मात्र, दोघेही वेग-वेगळ्या ठिकाणी नोकरीवर असल्याने हळू-हळू त्यांच्यातील ताण वाढू लागला व खटके उडू लागले. दरम्यान, सागरने दुसऱ्या मुलीशी गुपचूप साक्षगंध उरकून टाकले. 

इकडे सागरसोबत संसाराची स्वप्न पाहत असलेल्या तरुणीला ही बाब समजताच ती खचून गेली. लॉंग-डिस्टन्स रिलेशनशिपमधला हा दुरावा आधीच तिला सहन होत नव्हता त्यात सागरने दिलेल्या धोक्याने आगीत तेल ओतल्याचे काम केले. हा धोका सहन न झाल्याने तरुणीने झोपेच्या गोळ्या खाऊन स्वत:ला संपवण्याचा प्रयत्न केला. 

सुदैवाने वेळीच प्रकार लक्षात आल्याने तिला रुग्णालयात नेण्यात आले. तरुणीची प्रकृती सध्या धोक्याबाहेर आहे. ३० नोव्हेंबर रोजी पोलिसांनी मेडिकलमध्ये जाऊन तरुणीचे बयाण नोंदविले. प्रियकराने लग्नाचे आमिष दाखवून वारंवार तिचा फायदा घेऊन बलात्कार केल्याचे तरुणीने सांगितले. याप्रकरणी पोलिसांनी गुन्हा दाखल केला असून अधिक तपास सुरू आहे.