नागपुरात असामाजिक तत्त्वांचा युवकावर जीवघेणा हल्ला

Assault miscreant on youth, crime news, Nagpur बाईकवर चौबल सीट जाणाऱ्या असामाजिक तत्त्वांनी विनाकारण एका युवकाशी वाद घालून त्याच्यावर जीवघेणा हल्ला केला. ही घटना बुधवारी कपिलनगरच्या म्हाडा कॉलनीत घडली.

लोकमत  न्यूज  नेटवर्क

नागपूर : बाईकवर चौबल सीट जाणाऱ्या असामाजिक तत्त्वांनी विनाकारण एका युवकाशी वाद घालून त्याच्यावर जीवघेणा हल्ला केला. ही घटना बुधवारी कपिलनगरच्या म्हाडा कॉलनीत घडली.

शाहरुख अली (२५), मयूर ओंकार (१९), यश सोनेकर (२०) आणि अल्तमश मन्सुरी (२०) अशी आरोपींची नावे आहेत. घटनेचा सूत्रधार शाहरुख फरार असून इतर तीन आरोपींना अटक करण्यात आली आहे. म्हाडा कॉलनी येथील रहिवासी राहुल मरकाम पेंटरचे काम करतो. राहुल रात्री १०.३० वाजता बाईकवर स्वार होऊन घरी परतत होता. त्याच वेळी आरोपी मागून बाईकवर चौबल सीट आले. त्यांनी कपिलनगर बाजार चौकाजवळ राहुलच्या बाईकला धडक दिली. राहुलने सांभाळून बाईक चालविण्यास सांगितले असता आरोपींना राग आला. शाहरुखने शिवीगाळ करीत वाद घालणे सुरू केले. त्यांनी राहुलला बेदम मारहाण केली. दगडाने त्याचे डोके फोडले. शाहरुख चाकू काढून जीवे मारण्याची धमकी देत होता. दरम्यान परिसरातील नागरिक गोळा झाले. त्यामुळे आरोपी तेथून पसार झाले. नागरिकांनी राहुलला रुग्णालयात पोहोचविले. त्याच्या तक्रारीवरून कपिलनगर पोलिसांनी खुनाचा गुन्हा दाखल केला आहे. आरोपी गुन्हेगारी प्रवृत्तीचे असल्यामुळे नागरिकांमध्ये रोष आहे.