मास्क नाही तर माफी नाही, ५०० रुपये दंड द्यावाच लागेल!

नागपुरात रुग्णांची संख्या सतत वाढत आहे. तसेच मृतांची संख्या पण वाढत चालली आहे. यावर नियंत्रण करण्यासाठी नागरिकांनी नियमांचे पालन करणे आवश्यक आहे. मात्र अजूनही नियमांचे पालन होत नाही मास्क न वापरणाऱ्यांना २०० रुपये दंड केला जात होता. त्यानंतरही दिवसेंदिवस मास्क न वापरणाऱ्यांची संख्या वाढत असल्याने मास्क न वापरणाऱ्यांना ५०० रुपये दंड करण्याचे आदेश मनपा आयुक्त राधाकृष्णन बी. यांनी सोमवारी जारी केले.

ठळक मुद्दे मनपा आयुक्तांचे आदेश : स्वत:साठी नियमांचे पालन करा

लोकमत न्यूज नेटवर्क
नागपूर : नागपुरात रुग्णांची संख्या सतत वाढत आहे. तसेच मृतांची संख्या पण वाढत चालली आहे. यावर नियंत्रण करण्यासाठी नागरिकांनी नियमांचे पालन करणे आवश्यक आहे. मात्र अजूनही नियमांचे पालन होत नाही मास्क न वापरणाऱ्यांना २०० रुपये दंड केला जात होता. त्यानंतरही दिवसेंदिवस मास्क न वापरणाऱ्यांची संख्या वाढत असल्याने मास्क न वापरणाऱ्यांना ५०० रुपये दंड करण्याचे आदेश मनपा आयुक्त राधाकृष्णन बी. यांनी सोमवारी जारी केले. त्यानुसार दंड आकारण्याची कारवाई मनपाच्या उपद्रव शोध व निर्मूलन पथकाने सुरू केली आहे.
गृहमंत्री अनिल देशमुख यांनी रविवारी कोरोना नियंत्रण उपाययोजनांसंदर्भात आयोजित बैठकीत मास्क न वापरणाऱ्यांना ५०० रुपये दंड आकारण्याचे आदेश दिले होते. त्यानुसार आयुक्तांनी आदेश जारी केले.

उपद्रव शोध पथक व पोलिसांना अधिकार
महापालिका हद्दीतील शासकीय, निमशासकीय, खासगी, शैक्षणिक, विविध मंडळे, वैद्यकीय, रहिवासी व व्यावसायिक क्षेत्र, बाजारपेठा, सार्वजनिक ठिकाणे, धार्मिक स्थळे यासह अन्य ठिकाणी लागू राहणार आहेत. या आदेशाची अंमलबजावणी करण्याचे अधिकार मनपाचे उपद्रव शोध व निर्मूलन पथक, स्वच्छता निरीक्षक, झोनचे सहायक आयुक्त, स्वच्छता अधिकारी, पोलीस निरीक्षक आदींना देण्यात आले आहेत.