विदर्भात लसीकरणाला ७० टक्के प्रतिसाद
By लोकमत न्यूज नेटवर्क | Published: January 17, 2021 04:09 AM2021-01-17T04:09:39+5:302021-01-17T04:09:39+5:30
नागपूर : कोरोनाच्या प्रादुर्भावानंतर ज्या प्रतिबंधक लसीची संपूर्ण देश आतुरतेने वाट पाहत होता त्याचा शुभारंभ शनिवारी झाला. विदर्भातील ११ ...
नागपूर : कोरोनाच्या प्रादुर्भावानंतर ज्या प्रतिबंधक लसीची संपूर्ण देश आतुरतेने वाट पाहत होता त्याचा शुभारंभ शनिवारी झाला. विदर्भातील ११ जिल्ह्यात ५४ केंद्रावर ५५८५ पैकी ३९१६ लाभार्थ्यांना (७०.११ टक्के) लस देण्यात आली. विशेष म्हणजे, नागपूर व अमरावतीच्या प्रत्येकी एका केंद्रावर भारत बायोटेकने विकसित केलेली ‘कोव्हॅक्सीन’ तर इतर सर्व केंद्रावर सीरम इन्स्टिट्यूटने विकसित केलेली ‘कोव्हिशील्ड’ लस देण्यात आली. इतर जिल्ह्याच्या तुलनेत बुलडाणा जिल्ह्यात सर्वाधिक ९५ टक्के तर, सर्वात कमी लसीकरण गडचिरोली जिल्ह्यात ५४.२५ टक्के झाले.
कोरोना संसर्गाच्या लढाईत पहिल्या फळीमध्ये असलेल्या रुग्णालयातील कोरोना योद्धांचा लसीकरणाच्या पहिल्या टप्प्यात समावेश करण्यात आला. नागपूर जिल्ह्यात १७ हजार ८०० लाभार्थ्यांना ‘कोव्हिशील्ड’ तर, ५२०० लाभार्थ्यांना ‘कोव्हॅक्सीन’ लस दिली जाणार आहे. शनिवारी १२ केंद्र मिळून ११८५ लाभार्थ्यांचे लक्ष्य देण्यात आले होते. त्यात ७७६ (६५ टक्के) लाभार्थ्यांना लस देण्यात आली. शहराच्या तुलनेत ग्रामीणमध्ये लसीकरणाची टक्केवारी अधिक होती.
यवतमाळ जिल्ह्यात ५ केंद्रांवर प्रत्येकी १०० प्रमाणे ५०० लाभार्थ्यांच्या लसीकरणाचे लक्ष्य देण्यात आले होते. यातील ३५० (७० टक्के) लाभार्थ्यांनी लस घेतली. चंद्रपूर जिल्ह्यात ६ केंद्रावर ६०० लाभार्थ्यांच्या लसीकरणाचे लक्ष्य देण्यात आले होते. त्यापैकी ३३० (५५ टक्के) लाभार्थ्यांनी लस घेतली. वर्धा जिल्ह्यात ६ केंद्रावर ६०० लाभार्थ्यांपैकी ३४५ (५७.५ टक्के) लाभार्थ्यांना लस देण्यात आली. गोंदिया जिल्ह्यात ३ केंद्रावर ३०० लाभार्थ्यांपैकी २१३ (७१ टक्के), गडचिरोली जिल्ह्यात ४ केंद्रावर ४०० लाभार्थ्यांपैकी २१७ (५४.२५ टक्के) , भंडारा जिल्ह्यात ३ केंद्रावर ३०० पैकी २६५ (८८.३३ टक्के) , अमरावती जिल्ह्यात ५ केंद्रावर ५०० पैकी ४४० (८८ टक्के), बुलडाणा जिल्ह्यात ६०० पैकी ५७५ (९५.८३ टक्के), वाशिम जिल्ह्यात ३ केंद्रावर ३०० पैकी १६७ (५५.६६ टक्के) तर अकोला जिल्ह्यातील ३ केंद्रावर ३०० पैकी २३८ लाभार्थ्यांना (७९.३३ टक्के) लस देण्यात आली.
-‘कोव्हॅक्सीन’चे अमरावतीत १०० टक्के तर नागपुरात ५३ टक्के लसीकरण
विदर्भातील ५४ केंद्रावर सीरम इन्स्टिट्यूटची ‘कोव्हिशिल्ड’ तर नागपूर व अमरावती जिल्ह्याच्या प्रत्येकी एका केंद्रावर लाभार्थ्यांना भारत बायोटेकची ‘कोव्हॅक्सीन’ लस देण्यात आली. विशेष म्हणजे, अमरावती जिल्हा सामान्य रुग्णालय केंद्रावर १०० लाभार्थ्यांचे लसीकरणासाठी लक्ष्य देण्यात आले असता १०० टक्के उद्दिष्ट पूर्ण झाले. तर, नागपूर जिल्ह्यातील मेडिकल केंद्रावर १०० मधून ५३ लाभार्थ्यांनी लस घेतली. कोव्हॅक्सिन लसीचा तिसरा टप्पा अद्यापही सुरू आहे. यामुळे ही लस देताना लाभार्थ्याची मंजुरी घेण्यात आली.
जिल्हालक्ष्य लसीकरण
नागपूर ११८५ ७७६
यवतमाळ ५०० ३५०
वर्धा ६०० ३४५
चंद्रपूर ६०० ३३०
गोंदिया ३०० २१३
गडचिरोली ४०० २१७
भंडारा ३०० २६५
अमरावती ५०० ४४०
बुलडाणा ६०० ५७५
वाशिम ३०० १६७
अकोला ३०० २३८